Тажикстандын Канибадам районунда эки үй-бүлөдөн төрт кишини өлтүрүп кетишти
Маалыматка караганда, эки үй-бүлөдөн төрт адам киши колдуу болду.
Редакциянын өз булагы каза болгондордун экөө күйөөсү менен аялы, экөө эне-бала экенин билдирди.
"Үч баласы жетим калды, аларга тийген эмес", - деп кошумчалады "Озодинин" ишенимдүү булагы.
Ошондой эле түнү 70 жаштагы Оиша Шокирова менен анын 44 жаштагы уулу Жавлон Шокиров да киши колдуу болгону маалымдалды.
Бирок расмий органдар бул окуя тууралуу комментарий бере элек.
Бир жума мурун ошол эде райондо жубайлар менен төрт баласынын сөөктөрү табылган.
Бир жылда Согд облусундагы Канибадам районунда бери дегенде беш үй-бүлө киши колдуу болду. Жергиликтүү маалымат каражаттары жазгандай, көп учурда аларды муунтуп өлтүрүшкөн.
Алсак, 4-июнда тартип коргоо органдары эки үй-бүлөдөн бир түндө алты адам киши колдуу болгон окуяны иликтеп жатканы маалымдалган.
Окуя Санжидзор кыштагында 29-майга караган түнү болгону, бир үй-бүлө тажик улутундагылар, экинчиси жергиликтүү кыргыздар экени, чоо-жайы боюнча расмий маалымат бериле электиги кабарланган.
Жергиликтүү тургундар түнкүсүн көчөлөрдө беткапчан белгисиз адамдар жүргөнүн социалдык түйүндөргө жазган, түрдүү тайпаларда видеолор да тараган. Райондук жетекчилик маалымат каражаттарын жалган маалымат таратуу үчүн айыптаган жана ал кылмыштардын бири-бирине байланышы жоктугун буга чейин айткан.
Район жашоочулары бир нече окуядан кийин көчөлөрдө жарык орнотулганын билдиришти.