Бакыт Сыдыков экономика жана коммерция министринин милдетин аткаруучу болуп дайындалды
Кызматка дайындоо үчүн Бакыт Сыдыковдун талапкерлиги Жогорку Кеңешке макулдашууга киргизилет.
Маалыматты президенттин администрациясы 18-декабрда таратты.
Мурдагы экономика жана коммерция министри Данияр Амангелдиев мамлекет башчы Садыр Жапаровдун 16-декабрдагы жарлыгы менен Министрлер кабинетинин 1-орун басарынын милдетин аткаруучу болуп дайындалган. Бул кызматтагы Адылбек Касымалиев ошол эле күнү президенттин жарлыгы менен Министрлер кабинетинин төрагасынын милдетин аткаруучу кызматына киришкен.
Министрлер кабинетинин мурдагы төрагасы Акылбек Жапаров президенттин 16-декабрдагы дагы бир жарлыгы менен кызматынан бошотулган. Экс өкмөт башчы кызматтан өз арызынын негизинде кеткени айтылууда.
Бакыт Сыдыков президенттик администрациянын саясий-экономикалык иликтөөлөр башкармалыгын жетектеп келген. Өнүктүрүү жана инвестиция агенттигинин Байкоочу кеңешинде президенттин өкүлү болуп жүргөн.(ZKo)