Сирия: Козголоңчулардын лидери эл аралык санкцияларды алууну суранды
Ал ошондой эле Сириядагы баардык козголоңчул топтор таратылып, жоочулары Коргоо министрлигинин карамагына өтөрүн кошумчалады.
"Баары мыйзамга гана баш ийет",- деди ал.
Буга чейин Еврокомиссиянын башчысы Кая Каллас санкциялардын жоюлушу жана "Хайят Тахрир аш-Шам" радикал тобун "кара тизмеден" чыгаруу маселеси "жаңы жетекчиликтин сөздөрүнөн гана эмес, позитивдүү, реалдуу кадамдарынан" көз каранды экенин айткан.
Британиядан кийин Германиянын өкүлдөрү да Абу Мухаммед Аль Жулани менен баш калаа Дамаскта жолугууну көздөп жатышат. Андан мурда Франция өз делегациясын Сирияга жөнөткөн. Италиянын өкмөт башчысы Жоржа Мелони Сириянын жаңы лидерлери менен байланыш түзүүгө даярдыгын айтып, этияттык зарыл экенин кошумчалады.
42 жаштагы Абу Мухаммед Аль Жуланинин өз аты Ахмед Хусейн аль Шараа. Ал бир кезде "Аль-Каида" террордук уюмунун катарында болчу. Кийин "Ислам мамлекетинин" лидерлери менен жакын болгон. 2017-жылы Башар Асадга каршы турган оппозициячыл топтор менен бирге "Хайят Тахрир аш-Шам" уюмун негиздеген.
2013-жылы Аль-Жазира телеканалына Жулани Сирияда шарият мыйзамдары орношу керек экенин айткан.
Бирок соңку кездери эксперттер белгилегендей, Жулани жана ал башында турган топ ашынган исламчы деген түспөлдөн оолактоонун аракетин көрүүдө. Андай өзгөрүүлөргө карабай, анын тобу террордук топтор менен байланышы жана адам укуктары абалы кандай болот деген кооптонууну жаратууда.
Жулани Асадын бийлиги кулагандан кийин Сириядагы азчылыктарды, анын ичинде христиандарды, алавилерди жана башка өлкөнүн бардык элин коргоону убада кылган.