کراچۍ کې د ترهګرۍ ضد عدالت د پي ټي اېم یو فعال د پلټنو لپاره زندان ته لېږدولی دی
د پي ټي اېم د ګرفتارو غړو وکیلې منیزې کاکړې د ډېسېمبر پر ۱۹مه مشال راډیو ته وویل چې پولیسو د غورځنګ د کراچۍ څانګې یو مشر او د پښتنو د قامي جرګې د ۸۰ کسیزې کمېټۍ غړی مدیر الرحمان، چې په حقیار مسید پېژندل کېږي، د ډېسېمبر پر ۱۸مه تر نیولو یوه ورځ وروسته د ترهګرۍ ضد عدالت ته وړاندې کړ.
هغه وايي چې پولیسو له عدالته وغوښتل چې مسید دې ورته د پوښتنو لپاره وسپاري، خو قاضي ورسره و نه منله او په عدالتي تحویل کې یې زندان ته وسپاره.
د کراچۍ د جمشېد کوارټر پولیسو د ډېسېمبر پر ۱۷مه د نوموړي پر ضد دوه مقدمه دایره کړې. په یوه کې یې پر هغه تور پورې شوی چې په جمشېد کوارټر سیمه کې پولیسو ورڅخه د تالاشۍ پر مهال لاسي بم ترلاسه کړی دی. همدا لامل دی چې په مقدمه کې پر مسید د ترهګرۍ ضد قانون مادې هم شاملې دي.
پولیسو په دویمه قضیه کې پر حقیار مسید د ناقانونه وسلې او مرمۍ ګرځولو تور پورې دی.
خو پښتون ژغورنې غورځنګ دا تورونه رد کړي او مقدمې یې "درواغجنې" بللې دي.
د پي ټي اېم د سیند څانګې مشر نور الله ترین د ډېسېمبر پر ۱۹مه مشال راډیو ته وویل چې پولیسو او په ساده جامو کې کسانو مسید د ډېسېمبر پر ۱۷مه د کراچۍ له فقیر کوټ سیمې ونیوه.
ده وویل چې غورځنګ د هغه تر ورکېدو وروسته د سیمې په تاڼه کې رپورټ هم دایر کړی وو.
پولیس وخت په وخت په کراچۍ او د پاکستان په مختلفو برخو کې د پي ټي اېم فعالان نیسي او اوسمهال یې د یو مخکښ مشر علي وزیر په ګډون یوشمېر غړي او پلویان په مختلفو زندانونو کې پراته دي.
پښتون ژغورنې غورځنګ وايي چې د پاکستان د ایین او قانون له مخې د پښتنو د حقونو لپاره سوله ییزې مبارزې ته دوام ورکوي.