Москвада Армениянын мурдагы коргоо министри кармалды

Армениянын мурдагы коргоо министри Аршак Карапетян Москванын борборунда кармалды. Окуя 29-декабрда болгонун бир катар маалымат каражаттары, анын ичинде РБК, ТАСС жазды.


Карапетян Армениянын суранычы менен кармалган. Буга чейин расмий Ереван ага эл аралык издөө жарыяланган. Арменияда Карапетян "кызматынан кыянаттык пайдаланууга, бийлигинен аша чабууга жана ишкердик ишмердүүлүккө мыйзамсыз катышканы үчүн" айыпталып, ага кылмыш иши козголгон.


2018-2021-жылдары Карапетян Армениянын өкмөт башчысы Никол Пашиняндын кеңешчиси болгон. Кийин ал Куралдуу күчтөрдүн башкы штабынын жетекчи орун басары болуп турган. 2021-жылдын июль айында Коргоо министрлигинин башына дайындалган. Бир нече айдан кийин эле кызматтан алынган. 


Буга Азербайжан менен Армения аскерлеринин чек арада кагылышы түрткү болгон. Ереван бийлиги анда өлкөгө кол салуу аракети болгонун билдирсе, Баку армян тарап провокацияга барганын маалымдаган. 




Карапетяндын кызматтан алынышын комментарийлеп жатып Пашинян "2021-жылдын 14-ноябрдын таңында ал чек арада баары тынч деп билдирген. Дал ошол маалда азербайжандык аскерлер Армения Республикасынын аймагына чек аранын бир нече тилкесинен кирип келип, алтургай турумдарды ээлеп алышкан. Коргоо министри болуп туруп, ал бул тууралуу же билген эмес же мага жеткирген эмес. Мындай шарттарда мен эч кимди аябайм" деп түшүндүргөн. 


Кызматтан кеткенден кийин Карапетян "Бирдиктүү армян фронту" оппозициялык кыймылын жетектеп баштаган.