Paralajmërimi për bojkot të disa mediave nga LVV-ja shihet si sulm ndaj gazetarëve
AGK-ja përmes një reagimi tha se është e shqetësuar me këto zhvillime që lidhen me nisjen e fushatës për zgjedhjet parlamentare të 9 shkurtit.
Zyrtarisht, fushata njëmujore zgjedhore do të nisë më 11 janar.
“E ftojmë Lëvizjen Vetëvendosje që ta rishqyrtojë pozicionin e saj dhe t’u ofrojë mediave qasje të barabartë në fushatë”, tha AGK-ja në reagim.
AGK-ja kërkoi që mediave t’iu mundësohet që në mënyrë të barabartë të paraqesin programet e të gjitha subjekteve që marrin pjesë në zgjedhjet e 9 shkurtit.
“Bojkoti i paralajmëruar paraqet goditje të qëllimshme ndaj pluralitetit medial që e shquan Kosovën dhe është vazhdimësi e një sërë veprimesh të kësaj qeverie dhe të Lëvizjes Vetëvendosje të drejtuara kundër gazetarëve dhe mediave në Kosovë”, theksoi AGK-ja.
Nga Lëvizja Vetëvendosje nuk u janë përgjigjur pyetjeve të Radios Evropa e Lirë për konfirmimin ose mohimin e lajmit se kjo parti mëton të bojkotojë disa organizata mediale gjatë fushatës zgjedhore.
Shoqëria civile edhe më herët ka kritikuar Qeverinë e Kosovës, të udhëhequr nga Albin Kurti, për qasjen ndaj mediave.
Flutura Kusari, këshilltare ligjore në Qendrën Evropiane për Liri të Shtypit dhe Medias, tha për Radion Evropa e Lirë se bojkotimi i mediave, në të cilat LVV-ja ka qenë shpesh e pranishme sa ishte në opozitë në fushatën zgjedhore të vitit 2021, tregon se ky veprim po bëhet “për t’i ikur llogaridhënies dhe jo për ndonjë arsye parimore”.
“Bojkoti është vazhdimësi e luftës së Qeverisë dhe Lëvizjes Vetëvendosje kundër mediave, aktivistëve dhe shoqërisë civile të cilët përgjatë qeverisjes i ka konsideruar dhe trajtuar si armiq".
"Bojkoti është sulm ndaj mediave dhe të drejtës për informim dhe do të ishte mirë që Lëvizja të rishqyrtonte këtë vendim”, tha Kusari.
Sipas saj, sjellja e partisë në pushtet ndaj mediave është në kundërshtim me parimet e Bashkimit Evropian dhe Këshillit të Evropës, institucione ku Kosova synon të anëtarësohet.
Duke folur për fushatën zgjedhore, Kusari tha se pret që të ketë “përshkallëzim të narrativit kundër mediave dhe gazetarëve dhe shpresoj shumë që gjuha e ashpër ndaj gazetarëve të mos përkthehet në sulme fizike”.
Vetëm gjatë vitit 2023, AGK-ja ka regjistruar 53 raste të sulmeve apo kërcënimeve ndaj gazetarëve.
Po ashtu, vitin e kaluar në Indeksin për Lirinë e Shtypit të organizatës joqeveritare, Reporterët pa Kufij, Kosova u rendit në vendin e 75-të, apo 19 vende më poshtë se vitin paraprak.
Në këtë raport u tha se pavarësisht se vazhdojnë t’i mbajnë përgjegjës politikanët, gazetarët në Kosovë vazhdojnë të jenë “cak i sulmeve politike”.
Ndërkaq, në raportin për të drejtat e njeriut të Departamentit amerikan të Shtetit, vitin e kaluar, u citua Asociacioni i Gazetarëve të Kosovës që tha se “zyrtarë të Qeverisë, përfshirë kryeministrin dhe anëtarë të partisë në pushtet, janë angazhuar në fushata shpifëse për të minuar besimin e publikut në media”.