Сербияда студенттер маанилүү кан жолду торошту
Белградда жана өлкөнүн бир катар башка шаарларында жапырт нааразылык акциялары уланып жатканына бир айдан ашты.
Анын башталышына Сербия түндүгүндөгү Нови-Сад шаарындагы кырсык түрткү болгон. 1-ноябрда автобекеттин чатыры кулап, 15 адамдын өмүрү кыйылган.
Студенттер адегенде кырсыктын тыкыр иликтенишин жана күнөөлүүлөрдүн жоопко тартылышын талап кылышкан. Андан соң алар бийлик кулак салбай жатканын айтып, өкмөттү таркатууга жана парламенттик шайлоо өткөрүүгө чакыра башташты.
Студенттерди оппозиция активисттери жана жарандык коомдун өкүлдөрү колдошууда. Алардын пикиринде, Нови-Саддагы кырсыкка бийликтеги жемкорлуктан улам вокзалдын оңдоп түздөө иштери сапатсыз жүргүзүлүшү түрткү болгон.
Былтыр декабрдан бери төрт мамлекеттик университеттин 50дөн ашуун факультетинде жана ондогон мектептерде окуу токтоп турат.
Сербиянын президенти Александр Вучич бир жагынан акциянын катышуучуларынын талаптарына кулак салууга убада кылууда. Ал 25-январда вокзалдын реконструкциясына байланыштуу документтерди ачык жарыялоону тапшырды. Бул дагы студенттердин бир талабы болчу. Ошол эле маалда Вучич жана анын тарапташтары демонстранттарды чет элдик күчтөр менен биригип алып, Сербияны дестабилдештирүүгө аракет кылууда деп айыптап жатат.