Балыкчы–Кочкор жолунда кыймылга убактылуу чектөө киргизилет

Балыкчы – Кочкор автоунаа жолунун 40-43-чакырымдар аралыгында Кубакы ашуусунун бурулушуна чейинки бөлүгү маал-маалы менен жабылып, унаа кыймылына убактылуу чектөө киргизилет. Чектөө жаңы курулуп жаткан темир жолдун 37-40-чакырымдарында бургулоо-жардыруу иштери жүргүзүлүшүнө байланыштуу киргизилип жатканын 5-мартта Транспорт жана байланыш министрлиги маалымдады.



Маалыматка ылайык, аталган тилке аптанын дүйшөмбү, шаршемби, жума күндөрү саат 08:00ден 17:30га чейин жабык болот.



Министрлик убактылуу жаралып жаткан ыңгайсыздык үчүн кечирим сурап, айдоочуларды башка жол менен жүрүп турууга чакырды.




Жалпы узундугу 186 чакырымды түзгөн Балыкчы – Кочкор  – Кара-Кече темир жолунун курулушу 2022-жылы майда башталган жана 2030-жылга чейин аяктай турганы, ага өлкөнүн өз каражаты жумшалары айтылган.



Андан көп өтпөй “Кыргыз темир жолу” Орусиянын компаниялары аталган темир жол долбооруна катышарын билдирген. Буга байланыштуу аталган мекеме “Орусиялык экспорттук борбор” жана “РЖД интернешнл” компаниялары менен 2022-жылы 9-декабрда Бишкекте үч тараптуу меморандумга кол койгон.



Былтыр ноябрда Кыргызстандын Транспорт жана байланыш министрлиги АКШ өкмөтүнө бул долбоорго инвестиция салуу мүмкүнчүлүгүн карап көрүүнү сунуштаганы белгилүү болгон.(ZKo)