Dømt for valdtekt og seksuelle overgrep mot seks jenter

Ein 25-åring er dømt til fengsel i 10 år i Hordaland tingrett for valdtekter og seksuelle overgrep mot totalt 6 jenter i alderen 11–13 år.

Mannen må også betale totalt 1,2 mill. kroner i oppreisingserstatning til jentene.

Det skriv Bergens Tidende.

Ei av dei fornærma, ei 13 år gamal jente, skal ha blitt valdteken av mannen i ein skog for eitt år sidan.

Dei to hadde hatt kontakt i eit års tid i forkant. Jenta skreiv til mannen at ho hadde få venner og sleit psykisk. Ifølge dommen skal mannen ha lokka jenta til å sende seksualisert bilete av seg sjølv.

Retten skriv at fleire av dei fornærma var sårbare, noko mannen skal ha nytta seg av.

Mannen vedgjekk delvis straffskuld.