Ысык-Көлдө жол кырсыгынан төрт адам мүрт кетти

24-июнда Балыкчы-Ананьево-Каракол автоунаа жолунда болгон жол кырсыгынан төрт адам мүрт кетти. Кырсык Чырпыкты жана Тору-Айгыр айылдарынын ортосунда катталган.

Алдын ала маалыматка ылайык, “Тойота-Авалон” үлгүсүндөгү машине күн чыгыштан күн батышты карай баратып карама-каршы тилкеде келе жаткан “Мерседес-Бенц-Спринтер” автоунаасын сүзгөн.

Социалдык тармактарда тараган видеолордо “Тойота-Авалон” автоунаасы жолдон чыгып кеткенин, адамдар каза болгондордун сөөгүн алып кетип жатканын көрүүгө болот.

Кыргызстанда 2025-жылдын январь-март айларында 1300дөн ашык жол кырсыгы катталып, андан 110 адам каза болду. Дагы 2000ден көп киши ар кандай жаракат алды. (BTo)