Зәйдә чик сакчылары митингны яңа һәйкәл каршында уздырды (фоторепортаж)
Бүген Зәйдә, чик сагында хәрби хезмәт үткәннәр көне уңаеннан тантаналы митинг үтте. Башка еллардан аермалы буларак тантаналы чара әле бу көннәрдә генә шәһәребезнең күркәм урыннарының берсе Ринат Фәрдиев исемендәге паркның икенче өлешендә калкып чыккан чик сакчылары хөрмәтенә булдырылган һәйкәл каршында узды. Һәйкәлне шәһәребездә яшәүче, хәрби хезмәтне чик сагында үткәннәр бергәләшеп финанслап чынга ашырды. Чик сагында эте белән басып торучы солдатны гәүдәләндереп эшләнгән һәйкәлне районыбызның рәссам – скульпторы Фазыл Шиапов ясады. Аңа бу эше өчен Рәхмәт хаты тапшырылды.
Район башлыгы, зәйлеләр исеменнән митингка күпләп җыелүчы чик сакчыларын район башкарма комитеты җитәкчесе Илнар Хафизов, район башлыгы урынбасары Валерий Акатьев, баш хәрби комиссар Айрат Әгъләмҗанов, федераль куркынычсызлык хезмәтенең Зәй бүлеге җитәкчесе Раил Гарифуллин, ветеран Гамир Таҗетдинов, чик сакчыларының бу идеясен тормышка ашыруга ярдәм итүчеләрнең берсе булган район депутаты Эдуард Галиев тәбрикләделәр. Мондый һәйкәлнең иң беренчеләрдән булып якын-тирәдә Зәйдә барлыкка килүе, ил иминлеге өчен һәрчак беренче ударны үзләренә алучы чик сакчыларының традицион төстә бу көнне билгеләп үтеп, тарихыбызны онытмаулары белән горурлануларын белдерделәр.
Соңыннан инде арабыздан китеп барган батыр егетләр бер минут тынлык белән искә алынды, һәйкәлгә чәчәкләр куелды.