Агач утыртуда барыбыз да катнашыйк
“Яшел Россия” экологик өмәсенә райондашларыбыз да кушылды.
Көннәр яңгырлы торса да, агачлар утыртырга шактый кеше чыкты. Әлки урман хуҗалыгы җитәкчесе урынбасары Елена Васяйчева әйтүенчә, “Яшел Россия” өмәсендә мәктәп укучылары бигрәк тә актив булганнар. Аеруча Чуаш Кичүе, Апак, Әхмәт мәктәпләре урман хуҗалыгыннан күп агач үсентеләре алып утыртканнар.
5 октябрьдә республикада бердәм урман утырту акциясе булачак. Район урман хуҗалыгында әлеге мөһим чарага әзерләнәләр инде. Акциядә катнашучыларга биредә миләш, юкә, балан, нарат, чыршы кебек агач үсентеләре тәкъдим итәләр.