ЧIир юьтуш куьйгабахана Нохчийчуьра а, Дагестанера а доьзалш

ЧIир юьтуш куьйгабахана некъахьовзамехь кхелхинчу Нохчийчуьра БердакIелларчу 24 шо хиллачу Элимханов Хьамидан а, Дагестанера ХIинжа-гIаларчу Тимуркаев Адилан а доьзалш. И маслаIат деш дакъалоцуш бара Нохчийн Республикан муфтиятан декъашхой, шайна хьалхаваьлла нохчийн муфтийн когаметта Хетиев Ансар а волуш, хаам бо "Нохчийчоь тахана" агенталло.


Къинхетаме хилар, вовшашна къинтӀера довлар Далла дезна гIуллкх хиларх лаьцна дийцира маслаIат дечара. Дуккха а гулделлачу адамо баркалла элира чIир йита реза хиллачу доьзална.







2010-чу шарахь Нохчийчоьнан куьйгалхочо Кадыров Рамзана чIираш йитийтар Iалашонца, леррина комисси а кхоьллина, болх байтинера нохчашна юкъахь. 2011-гIа шо чекхдолуш цо дIахьедар дира, чIираш кхайкхорца йоьзна проблема дIаяьккхина ша аьлла. Iедалша чIагIдарехь, цу комиссин декъашхойн аьтто белира шерашкахь схьадохьуш хилла 451 дов дIадерзо.


Цул тIаьхьа и болх, кхин долу дахарехь Iиттало девнаш дIадерзорца цхьаьна, дIабахьарна декхарелахь йира республикера муфтият.