ნუკრი ქანთარია: ორი საათი მის კოლეგებს იტაცებდნენ, ბუნებრივია გახარია გასცემდა ბრძანებას
„ქართული ოცნების“ დეპუტატი ნუკრი ქანთარია აცხადებს, რომ 20 ივნისის ღამით აქციის მონაწილეების დაშლის გადაწყვეტილებას გიორგი გახარიას გარეშე არავინ მიიღებდა და უიმისოდ არც შეტევას დაიწყებდა ვინმე.
„ბუნებრივია, მისი ბრძანება იქნებოდა ისიც, რომ წინ არავის არცერთი ნაბიჯი არ გადაედგა. მაგრამ შემდეგ, როდესაც იძულებული გახდნენ, ნებართვისთვის მასთან მივიდოდნენ. ორი საათის განმავლობაში იტაცებდნენ მის კოლეგებს, იყო შეურაცხყოფა, ცემა-ტყეპა, ესენი ითმენდნენ. კორდონი შეთხელდა - ბუნებრივია, გასცემდა დასტურს გახარია და ისინიც გადავიდნენ შეტევაზე“, - განაცხადა ნუკრი ქანთარიამ.
ქანთარიას მიაჩნია, რომ გიორგი გახარიამ მოახერხა, რომ საკანონმდებლო ორგანო იქ შეჭრისა და ძალიან დიდი ქაოსისგან დაეცვა.
„პასუხისმგებლობას თავიდან არავინ არ აირიდებს, აქციაზე რადენიმე ადამიანმა მხედველობა დაკარგა, ეს არის შემაძრწუნებელი, თუმცა ეს რომ არ მომხდარიყო, არავითარი ზედმეტი კითხვები არ გაჩნდებოდა. პოლიციელებს გაუჩნდათ არა მხოლოდ მოგერიების ფარგლებში, არამედ ზოგიერთ პოლიციელს ანგარიშის გასწორების წყურვილიც გაუჩნდათ. გამოძიება გაარკვევს ეს ინდივიდუალური გადაწყვეტილება იყო, თუ საერთო ბრძანება. როდის უნდა ყოფილიყო წყალი, გაზი, რეზინის ტყვიები როგორ და რანაირად ყოფილიყო, ზემოთ ესროლეთ, მარჯვნივ ესროლეთ ბუნებრივია, გახარია ვერ უკარნახებდა“, – განაცხადა ნუკრი ქანთარიამ.
20 ივნისის ღამით შსს-ს სპეციალურმა რაზმმა რუსთაველის გამზირზე მიმდინარე აქცია რეზინის ტყვიებით, ცრემლსადენი გაზითა და წყლის ჭავლით დაშალა.