აჭარის ტელევიზია - მეორედ ჩაშლილი კონკურსი და თანამშრომლეთა ნაწილის პროტესტი
აჭარის ტელევიზიის თანამშრომელთა ნაწილმა შეძახილით: „ეს უკვე არასერიოზულია“ პროტესტის ნიშნად დატოვა კენჭისყრის ადგილი, სადაც მაუწყებლის დირექტორი უკვე მეორედ ვერ აირჩიეს. მათ შორის იყო აჭარის ტელევიზიის თანამშრომელი შოთა გუჯაბიძე, რომელმაც რადიო თავისუფლებას უთხრა, რომ მრჩეველთა საბჭოს შანსი ჰქონდა ღირსეული დირექტორი აერჩია:
„ღირსებას და ნამუსს რომ ცვლი მატერიალურზე აი, ამასთან გვაქვს საქმე ახლა. ხელისუფლება ცდილობს თავისი პრიმიტივიზმის ლუსტრაციით, თავისი კანდიდატის გაყვანას. თავისივე პრიმიტივიზმის მსგავსი დასაყრდენი იპოვა ბორდში, რომლებიც უკვე მეორეჯერ, წინა კონკურსის მსგავსად, იმავე კანდიდატს აძლევენ ხმას. - ეს ორი ხმა კი, არ არის საკმარისი. ახლა კი გაჩნდა შესაძლებლობა ხელისუფლების ცუდი განზრახვისთვის ხელი შეგვეშალა ჩვენ, მოქალაქეებს, რომლებსაც პრეტენზია გვაქვს, რომ უკეთესი ქვეყანა გვქონდეს. მრჩეველთა საბჭოს სამი წევრიდან განსაკუთრებით ერთს, რომელმაც არც ერთ კანდიდატს არ მისცა ხმა, ასეთი ისტორიული შანსი არ ექნება არასოდეს. რა თქმა უნდა, ეს არის პოლიტიკური თამაში. ვფიქრობ, რომ ორი ხმა რომელიც თინა ცისკარაძემ გაადროვა ღირსეული ბრძოლით მოიპოვა და საფეხბურთო ენაზე რომ ვთქვა, ღირსეული მოთამაშე იქნებოდა“ - თქვა შოთა გუჯაბიძემ.
დირექტორობის კანდიდატი თინა ცისკარაძე მეორე კონკურსში მონაწილეობს მან მრჩეველთა საბჭოს ორი წევრის -ნატა იმედაიშვილის და გიორგი ირემაძის ხმები მიიღო. წინა ჩაშლილი კონკურსის მსგავსად ახლაც ორი მრჩევლის ხმა მიიღო მერაბ წულუკიძემ, მას მრჩეველთა საბჭოს ორმა წევრმა -ირაკლი დარცმელიძემ და გიგა ჩხარტიშვილმა მისცა ხმა. საბჭოს მეხუთე წევრმა ბეჟან გობაძემ (ნაციონალური მოძრაობის კვოტით გასული) კი, რომლის ხმა გადამწყვეტი აღმოჩნდა, მეორე ტურში გასულ არც ერთ კანდიდატს არ მისცა ხმა და ბიულეტენზე დაწერა გადაყენებული დირექტორის, ნათია კაპანაძის სახელი და გვარი:
„მე ვაფრთხილებდი მრჩეველთა საბჭოს, რომ არ გადაეყენებინათ ნათია კაპანაძე უფლებამოსილების ამოწურვამდე ხუთი თვით ადრე. იმიტომ რომ ეს გამოიწვევდა უხერხულობებს და აი გამოიწვია“ - განაცხადა ბეჟან გობაძემ.
მრჩეველთა საბჭომ ტელევიზიის ყოფილი დირექტორი ნათია კაპანაძე თანამდებობიდან აპრილში გადააყენა. ნათია კაპანაძეს ეს გადაწყვეტილება ბათუმის საქალაქო სასამართლოში აქვს გასაჩივრებული. მისი სარჩელის ერთ-ერთი მოთხოვნა იყო, რომ დირექტორის ვაკანსიაზე გამოცხადებული კონკურსი შეჩერებულიყო. მოსამართლემ ეს შუამდგომლობა არ დააკმაყოფილა.
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭომ უკვე მეორე კონკურსის შედეგად ვერ აირჩია რეგიონული მაუწყებლის დირექტორი. პირველი კონკურსის დროს, სადაც 8 კანდიდატი მონაწილეობდა 31 მაისს ჩატარებულ კენჭისყრაზე ხმები გადანაწილდა შემდეგნაირად: მერაბ წულუკიძემ ორი ხმა მიიღო, თითო ხმა მიიღეს, ბაჩო გურაბანიძემ, ირმა ზოიძემ და ნათია ზოიძემ.
10 ივლისს ხელმეორედ ჩატარებული კონკურსში11 კანდიდატი მონაწილეობდა, პირველი კენჭისყრის შედეგად ხმები სამ კანდიდატს შორის გაიყო. თინა ცისკარაძემ მიიღო ორი ხმა, ამდენივე ხმა მიიღო მერაბ წულუკიძემ, ერთი ხმა კი ბაჩო გურაბანიძემ. ჩატარებული მეორე ტურის დროს კი, სადაც მხოლოდ ცისკარაძე და წულიკიძე მონაწილეობდნენ ხმები ისევ ორად გაიყო, მეხუთე მრჩევლის ხმა კი არც ერთ კანდიდატს არ ერგო.
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს 5 წევრიდან ორი „ერთიანი ნაციონალური მოძრაობის“ კვოტითაა არჩეული (ბეჟან გობაძე, ირაკლი დარცემლიძე). თითო-თითო პარტია „ქართულ ოცნების“ (გიგა ჩხარტიშვილი) „თავისუფალი დემოკრატების“ (ნატა იმედაიშვილი) და „რესპუბლიკელების“ (გიორგი ირემაძე) კვოტით.
12 ივლისს მრჩევეთა საბჭო, უკვე მესამედ გამოაცხადებს აჭარის ტელევიზიისა და რადიოს დირექტორის შესარჩევ კონკურსს.