თურქმენეთის დიპლომატიური წარმომადგენლობები უარყოფენ ბერდიმუჰამედოვის სიკვდილის შესახებ ცნობას
თურქმენეთის პრეზიდენტის, გურბანგული ბერდიმუჰამედოვის სიკვდილის შესახებ ცნობა სინამდვილეს არ შეესაბამება. ამის თაობაზე მოსკოვში თურქმენეთის საელჩოზე დაყრდნობით იუწყება რუსეთის საინფორმაციო სააგენტო ტასი. სააგენტოს მოჰყავს საელჩოს წარმომადგენლის სიმტყვები, რომ „ეს სრული სიცრუეა. ამ ცნობას უარვყოფთ“.
უფრო ადრე გავრცელდა ცნობა თურქმენეთის პრეზიდენტის გურბანგული ბერდიმუჰამედოვის გარდაცვალებაზე.
ის გაავრცელა რადიოსადგურმა „ლაპარაკობს მოსკოვი“ ევრაზიული პრობლემების მონიტორინგის ცენტრის დირექტორ, ასლან რუბაევზე დაყრდნობით. რუბაევის თქმით, მას ინფორმაცია მიაწოდა „ნაცნობმა აშხაბადიდან, რომელიც სპეცსამსახურში მუშაობს“.
რადიო თავისუფლების თურქმენული სამსახურის თანახმად, მასაც მიაწოდეს ცნობა ბერდიმუჰამედოვის სიკვდილზე, მაგრამ არაერთმა მცდელობამ, დაედასტურებინათ, ან უარეყოთ ინფორმაცია, შედეგი ვერ გამოიღო.
სიკვდილის ცნობა უარყო ასევე თუქრმენეთის საელჩომ ყირგიზეთში, იტყობინება АКИ Пресс.
ბერდიმუჰამედოვი შვებულებაში იმყოფებოდა 15 ივლისიდან. 21 ივლისს თურქმენეთის სახელმწიფო ტელევიზიამ ეთერში აჩვენა კადრები, სადაც ჩანს ბერდიმუჰამედოვი, მაგრამ, ისინი გადაღებული უნდა იყოს რამდენიმე დღით ადრე, როცა პრეზიდენტი შვებულებაში გადიოდა, იტყობინება თურქმენული სამსახურის კორესპონდენტი აშხაბადიდან. მისი თქმით, ვითარება ქალაქში ორდინარულია.
გურბანგული ბერდიმუჰამედოვი თურქმენეთის პრეზიდენტია 2006 წლიდან. 2017 წელს გამართულ არჩევნებში მიიღო ხმების 97 პროცენტი და მესამე ვადით იქნა არჩეული.