მამუკა ხაზარაძის თქმით, მოლაპარაკება ახალ საფეხურზე გადავიდა
პოლიტიკური პარტია „ლელოს“ ლიდერის, მამუკა ხაზარაძის შეფასებით, ევროპული საბჭოს პრეზიდენტის შარლ მიშელის ინიციატივით ორგანიზებულ შეხვედრის შემდეგ, შეიძლება ითქვას რომ მოლაპარაკებები ახალ საფეხურზე გადავიდა. ორბელიანების სასახლეში გამართულ შეხვედრას ოპოზიციისა და ხელისუფლების, წარმომადგენლები ესწრებოდნენ.
„შეხვედრა იყო პოზიტიური. ეს საუბარი და მოლაპარაკება გადავიდა პრინციპულად ახალ საფეხურზე, მედიაციის კატეგორიაში. ეს ნიშნავს, რომ პრეზიდენტი მიშელი პირადადაა ჩართული ამ მოლაპარაკებაში. ის შეგვპირდა, რომ უახლოეს ხანში ის ჩართავს ამ მოლაპარაკებაში საკმაოდ მძიმე წონიან პოლიტიკოსებს ევროკავშირიდან. ამავე დროს, შეჯერდა ყველა პუნქტი, რომელიც აწუხებდა ჩვენს საზოგადოებას, ოპოზიციას, ხელისუფლებას. ეს არის პოლიტიზებული სასამართლო სისტემა, ახალი არჩევნები, საარჩევნო კანონმდებლობის შემუშავება, ეს არის რიგგარეშე არჩევნების საკითხის განხილვა, ეს არის პოლიტიკური პატიმრების საკითხი. ბუნებრივია, დღეს ყველა ამ საკითხზე ვერანაირი შეთანხმება ვერ მოხდებოდა. მთავარია, რომ პროცესი დაიძრა და ამ პროცესს ახლავს კონკრეტული ვადები. ვადა დაინიშნა დაახლოებით ორი კვირა, 16 მარტს არის შეხვედრა ბრიუსელში და იმ მომენტისთვის ჩვენ, ხელისუფლებამ და ოპოზიციის წარმომადგენლებმა, უნდა მოვახერხოთ, რომ ეს საკითხები ჩვენი ქვეყნის საკეთილდღეოდ გადავწყვიტოთ“, - განაცხადა მამუკა ხაზარაძემ.
რომლის სიტყვებითაც, შეხვედრაზე პრემიერ-მინისტრის ირაკლი ღარიბაშვილის მხრიდან იყო წარსულის გახსენების მცდელობა, თუმცა შეთანხმდნენ, რომ მსგავსი საუბარი შეწყდება.
„ჩვენ გვჭირდება გამოსავალი და გამოსავალი არის მხოლოდ მომავალში. ვფიქრობ, რომ პროცესი სხვა კატეგორიაში გადავიდა და იმედი მაქვს, თუ ხელისუფლება იქნება გონივრული და მოქნილი ამ საკითხების გადაწყვეტაში, გამოსავალს ვნახავთ. კიდევ ერთ რამეზე შევთანხმდით, რომ არ უნდა იყოს კუნთების თამაში, ვის უფრო ძლიერი პოზიცია აქვს, ვინ უფრო ძლიერია ქუჩაში, ვის უკავია ხელისუფლება. კუნთების თამაშმა შეიძლება ეს ქვეყანა მძიმე მდგომარეობამდე მიიყვანოს. პოლიტპატიმრების ნაწილსაც შევეხეთ, კატეგორიულად იყო დასმული საკითხი, რომ, სანამ მელია არის ამ მდგომარეობაში, ძნელია საუბრის გაგრძელება, მაგრამ იმედი მაქვს ამ გამოსავალსაც ორივე მხარე ერთად ნახავს“, - განაცხადა მამუკა ხაზარაძემ.
შარლ მიშელი პრემიერ ღარიბაშვილთან ერთად გამართულ პრესკონფერენციაზე გამოვიდა ინიციატივით ოპოზიციასა და პრემიერს შორის დღეს საღამოს შეხვედრის გამართვის შესახებ. პრემიერმა ღარიბაშვილმა იქვე დაადასტურა ოპოზიციასთან შეხვედრის მზადყოფნა.
შეხვედრის დასრულების შემდეგ შარლ მიშელმა განაცხადა, რომ ის ამაყობს, რომ ამ შეხვედრით კარგი ნაბიჯი გადაიდგა სწორი მიმართულებით.
ორბელიანების სასახლეში გამართულ შეხვედრას ესწრებოდნენ ოპოზიციური პოლიტიკური პარტიების ლიდერები, საქართველოს პრემიერ-მინისტრი ირაკლი ღარიბაშვილი, ევროკავშირის ელჩი საქართველო კარლ ჰარცელი, ევროპული საბჭოს პრეზიდენტი შარლ მიშელი და საქართველოს პრეზიდენტი სალომე ზურაბიშვილი.
ევროპული საბჭოს პრეზიდენტი შარლ მიშელის ვიზიტი მიმდინარეობს საქართველოში ბოლო საპარლამენტო არჩევნების შემდეგ შექმნილი პოლიტიკური კრიზისის ფონზე, რომელიც კიდევ უფრო გაამწვავა „ნაციონალური მოძრაობის“ თავმჯდომარის, ნიკა მელიას დაპატიმრებამ.
მიშელი ვიზიტის ფარგლებში შეხვდა პრეზიდენტს, პრემიერ-მინისტრს, ოპოზიციის წარმომადგენლებს და პარლამენტის თავმჯდომარეს. ის ასევე ჩავიდა საოკუპაციო ხაზთან.