იმ პერიოდში, როდესაც რეგიონალური ლანდშაფტის ხელახალი ფორმირება ხდება, საქართველო ისეთი მნიშვნელოვანია, როგორც არასდროს
ევროკავშირს შეუძლია დაეყრდნოს სტაბილურ, პროევროპულ პარტნიორს იმ რეგიონში, რომელიც აუცილებელია ევროპის ღირებულებებისთვის, უსაფრთხოებისა და დაკავშირებადობისთვის. იმ პერიოდში, როდესაც რეგიონალური ლანდშაფტის ფორმირება, ხდება, საქართველო ისეთი მნიშვნელოვანია, როგორც არასდროს, – ამის შესახებ აღნიშნულია საქართველოს პრეზიდენტის, სალომე ზურაბიშვილისა და ევროპული საბჭოს პრეზიდენტის, შარლ მიშელის ერთობლივ სტატიაში – „საქართველოს მომავალი ევროპულია“ – რომელიც „ევრონიუსმა“ გამოაქვეყნა.
სტატიაში საუბარია საქართველოში 19 აპრილს გაფორმებულ შეთანხმებაზე და მის მნიშვნელობაზე საქართველოს, ქართველი ხალხისა და ევროკავშირისთვის.
„ეს შეთანხმება გააღრმავებს ქვეყნის ინსტიტუტების რეფორმებს. საარჩევნო პროცესი დააკმაყოფილებს უმაღლეს სტანდარტს, სასამართლო სისტემის რეფორმამ კი მართლმსაჯულების ნებისმიერი სახით პოლიტიზირებული აღქმა უნდა დაასრულოს.
ძალაუფლების განაწილების პროცედურები საქართველოს პარლამენტს ერთ – ერთ ყველაზე პლურალისტულ[ორგანოდ] აქცევს. ეს ცვლილებები არა მხოლოდ ქართულ დემოკრატიას გახდის უფრო აქტიურს, არამედ უზრუნველყოფს რეფორმების ინკლუზიურობასა და სიცოცხლისუნარიანობას.
პარტიული მტრობიდან აქცენტი გადავა იმ გამოწვევებზე, რომელიც ქვეყნის წინაშე დგას, როგორიცაა პანდემიასა და მის ეკონომიკურ და სოციალურ შედეგებთან გამკლავება, სტაბილურობის შენარჩუნება. ქართველებმა ნახეს, რომ ისინი ამ კრიზისის გადალახვის დროს მარტო არ იყვნენ. დღემდე ევროკავშირი იყო საქართველოს ყველაზე დიდი დონორი 200-ზე მეტი კონკრეტული პროექტით და 500 მილიონი ევროს მოცულობის ბიუჯეტით. ევროპის საინვესტიციო ბანკმა დაახლოებით 1.85 მილიარდი ევროს ინვესტიცია განახორციელა საქართველოს ეკონომიკურ განვითარებაში, სოფლის მეურნეობაში, განათლებასა და ინფრასტრუქტურაში.
ამას მოჰყვება უფრო ხელშესახები მხარდაჭერა ევროპიდან. ხელშეკრულება სახელწოდებით: “საქართველოს წინსვლის გზა”- გზას უხსნის ევროკავშირთან მჭიდრო თანამშრომლობას; ფინანსურ დახმარებას, რომლის მიზანი პოსტკოვიდურ პერიოდში ეკონომიკური აღდგენის პროცესის შემსუბუქებაა; ევროკავშირის პროგრამებში გაძლიერებულ მონაწილეობას; ფიზიკურ და ციფრულ ინფრასტრუქტურულ პროექტებზე ორიენტირებას, რომლებსაც შეუძლიათ გაზარდონ საქართველოს და კავკასიისა და შავი ზღვის რეგიონების ევროპასთან კავშირი,“- აღნიშნულია სტატიაში.
სალომე ზურაბიშვილი და შარლ მიშელი მიიჩნევენ, რომ ორმხრივი ინტერესების გათვალისწინებით, ევროკავშირსა და საქართველოს ასოცირების შეთანხმების შესრულების კიდევ უფრო გაღრმავება და თანამშრომლობის კიდევ უფრო განმტკიცება სჭირდებათ.
„ევროკავშირს შეუძლია დაეყრდნოს სტაბილურ, პროევროპულ პარტნიორს იმ რეგიონში, რომელიც აუცილებელია ევროპის ღირებულებებისთვის, უსაფრთხოებისა და დაკავშირებადობისთვის. იმ პერიოდში, როდესაც რეგიონალური ლანდშაფტის ხელახალი ფორმირება ხდება, საქართველო ისეთი მნიშვნელოვანია, როგორც არასდროს.
ორმხრივი ინტერესების გათვალისწინებით, ევროკავშირსა და საქართველოს ახლა სჭირდებათ ასოცირების შეთანხმების შესრულების კიდევ უფრო გაღრმავება და თანამშრომლობის კიდევ უფრო განმტკიცება. ორმხრივი დღის წესრიგის გარდა, ჩვენ გავაგრძელებთ მუშაობას განახლებული და გაღრმავებული აღმოსავლეთ პარტნიორობისთვის, რომელიც აფართოებს თანამშრომლობის სფეროებს, ზრდის ევროკავშირის მხარდაჭერას და აფართოებს კავშირებს ჩვენს ხალხებს შორის. ამის პარალელურად, ევროკავშირსა და „აღმოსავლეთ პარტნიორობაში“ მის ასოცირებულ პარტნიორებს შორის განსაკუთრებული ურთიერთობის აღსანიშნავად, ჩვენ ვთავაზობთ უახლოეს თვეებში ლიდერების შეხვედრის გამართვას უკრაინისა და მოლდოვას რესპუბლიკის პრეზიდენტებთან.
რეგიონში გაზრდილი გეოპოლიტიკური ზეწოლის დროს, არ არსებობს იმაზე უკეთესი პასუხი, რისი დემონსტრირებაც ევროპამ და საქართველომ მოახდინეს. ერთი მხრივ, გადამწყვეტი ევროპული პოლიტიკური მხარდაჭერა მცირე, მაგრამ ძლიერი დემოკრატიისადმი და დესტაბილიზაციის ნებისმიერი ფორმის თავიდან ასაცილებლად. მეორეს მხრივ, საქართველოს გადაწყვეტილება შეუფერხებლად გააგრძელოს სვლა ევროატლანტიკური მომავლისკენ არჩეული გზაზე,“- აღნიშნულია სტატიაში.