პიკეტის დღე დედაქალაქში - რა არ უნდა გამოგრჩეს 25 მაისს
შემატებს თუ წაართმევს ძალას დედაქალაქი რიონის ხეობის მცველებს
"ნამახვანჰესის" მშენებლობის მოწინააღმდეგეები დღეს, 25 მაისს თბილისის ქუჩების პიკეტირებას გეგმავენ. ინფორმაცია მედიას აქციის ერთ-ერთმა ორგანიზატორმა, ვარლამ გოლეთიანმა მიაწოდა. მისი თქმით, პიკეტი 4 საათზე დაიწყება.
„ნამახვანჰესის“ საწინააღმდეგო საპროტესტო მოძრაობა დედაქალაქში თვისებრივად ახალი გამოწვევების წინაშე დადგა.
გუშინ დილით, რესპუბლიკის მოედანზე აქციის იდეოლოგიურად დაპირისპირებულ მონაწილეებს შორის კონფლიქტი ვარლამ გოლეთიანის პატარა გამოცდად იქცა.
"რა არის ახლა ამ ძალადობის და დაპირისპირების გამომწვევი მიზეზები? ეს შეიძლება გახდეს რაღაც სიმბოლიკები და ჩვენ მუდმივად ვამბობთ, რომ ნებისმიერი ტიპის სიმბოლიკა, რაც არ არის სახელმწიფო სიმბოლიკა, არ დაიშვება ჩვენს აქციებზე და გთხოვთ, რომ ეს გაითვალისწინოთ", - ასე გამოეხმაურა "რიონის ხეობის მცველების" ლიდერი მის მიერ ორგანიზებული აქციიდან ცისარტყელასსამკლავურიანი ახალგაზრდა ქალის გაძევებას. ვარლამ გოლეთიანი ამ განცხადების გამო საჯაროდ დაადანაშაულეს ულტრანაციონალისტური ჯგუფების წევრების ირიბ თუ პირდაპირ მხარდაჭერაში.
„რიონის ხეობის მცველებმა” თბილისში ჩამოსვლისას, 23 მაისს ხელისუფლებას ვადა მათი მოთხოვნების შესრულებისთვის 24 მაისის დღის 12 საათამდე მისცეს. სანამ შუადღე შესრულდებოდა, პრემიერ-მინისტრმა და პარლამენტის წევრებმა თქვეს, რომ ულტიმატუმების ენით ლაპარაკს არ დაუშვებდნენ და „ნამახვანჰესის“ მოწინააღმდეგეებს გონიერებისკენ მოუწოდეს. ცხადი იყო, რომ ხელისუფლება არც 12 საათამდე და არც მერე არანაირი მოთხოვნის შესრულებას არ აპირებდა.
მეორე საპროტესტო დღის შეჯამება წაიკითხე ნასტასია არაბულის სტატიაში.
ელჩების გაფრთხილება - დანიშვნების პროცესი სასამართლო სისტემაში მაინც გრძელდება
საერთაშორისო პარტნიორები, არასამთავრობო სექტორი, პოლიტიკოსები და საზოგადოებრივი ჯგუფები კიდევ ერთხელ გაერთიანდნენ „სასამართლო კლანის“ გაძლიერებისკენ მიმართული მორიგი პროცესის შესაჩერებლად. ახლა ყველა ერთხმად მოითხოვს იუსტიციის უმაღლესი საბჭოს ახალი წევრების სადავო დანიშვნის გადავადებას. ისინი ამ პროცესს ნაჩქარევს უწოდებენ.
პარლამენტში აცხადებენ, რომ პროცესი ვერ მოიცდის სასამართლო სისტემის პარალიზების საფრთხის გამო. რადიო თავისუფლებას იუსტიციის უმაღლეს საბჭოში უთხრეს, რომ წინააღმდეგობის მიუხედავად, 26 მაისს მოსამართლეთა კონფერენცია მაინც გაიმართება. პარალელურად იგეგმება არასამთავრობო სექტორის საპროტესტო აქციაც.
გუშინ პარლამენტის თავმჯდომარემ, კახა კუჭავამ საპასუხო წერილი გაუგზავნა აშშ-ის, ევროკავშირისა და ევროსაბჭოს ელჩებს და შეატყობინა, რომ არ დაკმაყოფილდება მათი რეკომენდაცია - ვაკანტურ ადგილებზე იუსტიციის უმაღლესი საბჭოს ახალი წევრების დამტკიცებისა და უზენაესი სასამართლოსთვის ახალი მოსამართლეების შერჩევის პროცესის შესახებ.
არადა, 22 მაისს კუჭავამ დიპლომატებისგან წერილი მიიღო, სადაც აღნიშნული იყო, რომ სასამართლო რეფორმების ვალდებულებების შესრულებაზეა დამოკიდებული, მიიღებს თუ არა საქართველო ევროკავშირის მაკროეკონომიკურ დახმარებას.
წაიკითხე მეტი ლელა კუნჭულიას სტატიაში.
რა მოხდება ბელარუსსა და ევროკავშირს შორის?
რომ არა გასული კვირის ბოლოს Ryanair-ის სამგზავრო თვითმფრინავის იძულებით დასმა მინსკში, შეიძლება ითქვას, ევროკავშირს წელს ძლიერი ფორმით ეტყობოდა „ბელარუსით დაღლა“.
ახლა ბელარუსი ისევ დაბრუნდა ევროკავშირის ქვეყნების დღის წესრიგში და წევრი ქვეყნებიც ცდილობენ ადეკვატური პასუხი გასცენ იმას, რაც ლუკაშენკას რეჟიმმა ჩაიდინა.
დღეიდან ლიეტუვა კრძალავს მეზობელი ბელარუსის საჰაერო სივრცეში ფრენას. საგარეო საქმეთა მინისტრმა, გაბრიელიუს ლანდსბერგისმა შეხვედრის მონაწილეებს უთხრა, რომ ლიეტუვის მოქალაქეებს ურჩევენ, არ ჩავიდნენ ბელარუსში, ხოლო მათ, ვინც უკვე იქ არის, მოუწოდებენ, დაუყოვნებლივ დატოვონ ქვეყანა.
ლიეტუვა უკვე იქცა ბელარუსი დისიდენტებისა და ოპოზიციონერების თავშესაფრად. სწორედ ლიეტუვაში იმყოფება პრეზიდენტობის ყოფილი კანდიდატი სვიატლანა ციხანოუსკაია.
რა ზომებს შეიძლება მოველოდეთ ბრიუსელისგან? წაიკითხე ვრცლად რადიო თავისუფლების ბრიუსელის კორესპონდენტის რიკარდ იოზვიაკის ბლოგში.
დღეს პარლამენტში საარჩევნო კოდექსში შესატანი ცვლილებების პირველი მოსმენა გაიმართება
პარლამენტში პლენარულ სხდომაზე გაიმართება პირველი მოსმენა კანონპროექტისა, რომელიც საარჩევნო კოდექსში შესატან ცვლილებებს შეეხება. კანონპროექტი უკვე გაგზავნილია რეკომენდაციებისთვის ვენეციის კომისიაში, თუმცა საკანონმდებლო ორგანო მას დღეს მაინც განიხილავს. მმართველ პარტიაში ამბობენ, რომ კანონპროექტი პირველი მოსმენით დამტკიცდება კიდეც.
ოპოზიცია პროექტს აკრიტიკებს და კონკრეტულ შენიშვნებზეც მიუთითებს. კანონპროექტში არ არის ასახული კონკრეტული მექანიზმები საზოგადოებისთვის ერთ-ერთ ყველაზე საინტერესო საკითხზე, რაც ამომრჩეველთა იდენტიფიცირებისა და ხმების დათვლის ელექტრონული სისტემების დანერგვას უკავშირდება. რადიო თავისუფლებას „ქართულ ოცნებაში“ უთხრეს, რომ ეს საკითხი ცალკე უნდა გადაწყდეს, კონკრეტულ ტექნიკურ ჯგუფთან შეთანხმებით. თუმცა ელექტრონული სისტემების სრული დანერგვა მომავალი არჩევნებისთვის მაინც ვერ ხერხდება.
კიდევ რა წერია და რა არა კანონპროექტში და რა არ მოსწონს ოპოზიციას, წაიკითხე ვრცლად ლელა კუნჭულიას სტატიაში.
ჭიათურის მუნიციპალიტეტში აქციის მონაწილეებს სახალხო დამცველის წარმომადგენელი შეხვდა
ჭიათურის მუნიციპალიტეტის სოფელ შუქრუთში მიმდინარე შიმშილობის აქციის მონაწილეებს საქართველოს სახალხო დამცველის წარმომადგენელი შეხვდა. შეხვედრაზე აქციის მონაწილეებმა ომბუდსმენის წარმომადგენელს საკუთარი პრობლემების შესახებ მიაწოდეს ინფორმაცია.
გუშინ შუქრუთში აქციის მონაწილე 5 კაცს 3 ქალი შეუერთდა და პროტესტის ნიშნად პირი ამოიკერა. სოფლის მცხოვრებთა ნაწილი მოითხოვს, რომ „ჯორჯიან მანგანეზმა“ მადნის მოპოვება შეწყვიტოს, ან დაზარალებულებს განსახლებისთვის ადეკვატური კომპენსაცია გადაუხადოს.
საპროტესტო აქცია სამ თვეზე მეტია გრძელდება, 11 მაისის შემდეგ 8 ადამიანი შიმშილობს. ადგილობრივ მცხოვრებთა თანახმად, „ჯორჯიან მანგანეზის“ კონტრაქტორი კომპანიის, „შუქრუთი +“-ის მიერ მარგანეცის მოპოვებით სერიოზულად დაზარალდნენ - ინგრევა სახლები, აღარ მოდის მოსავალი და არაერთ ეზოში მიწა ჩავარდა. აქციის მონაწილეები მოითხოვენ, რომ ზარალი არა კომპანიამ, არამედ ექსპერტიზის ეროვნულმა ბიურომ შეაფასოს.
წაიკითხე მეტი.
გაეროს ხელმძღვანელი გამოდის მოწოდებით "საომარი ეკონომიკის" შემოღებისკენ, პანდემიის დასამარცხებლად
გაეროს გენერალური მდივანი, ანტონიო გუტერეში აცხადებს, რომ მსოფლიო ომშია COVID-19-ის წინააღმდეგ და გამოდის მოწოდებით, ამოქმედდეს საომარი ლოგიკა, რათა გამოსწორდეს უსამართლო უთანასწორობა პანდემიასთან ბრძოლაში საჭირო საშუალებების ხელმისაწვდომობაზე.
"ჩვენ საომარი ეკონომიკის ლოგიკა და გადაუდებლობა გვჭირდება, საიმისოდ, რომ ჩვენი შეიარაღების შესაძლებლობები გავზარდოთ", - თქვა მან 24 მაისს, ჯანდაცვის მსოფლიო ორგანიზაციის (WHO) ყოველწლიური ასამბლეის გახსნაზე ჟენევაში. გუტერეშმა ილაპარაკა პანდემიის მიერ მოტანილ ტკივილსა და სირთულეებზე - რომ ვირუსს, 2019 წელს ჩინეთში გამოჩენის შემდეგ, ემსხვერპლა 3,4 მილიონზე მეტი ადამიანი და დაიკარგა 500 მილიონზე მეტი სამუშაო ადგილი.
წაიკითხე მეტი.
B.1.617 ანუ „ორმაგი მუტანტი“ - დადასტურდება თუ არა საქართველოში „ინდური შტამი“?
B.1.617 - ეს COVID-19-ის ინდური ვარიანტის ოფიციალური სახელია. არაოფიციალურად მას „ორმაგ მუტანტსაც“ უწოდებენ. ე.წ. ინდური შტამი ორ მუტაციას აერთიანებს - E484Q-სა და L452R-ს. ეს მუტაციები ცალ-ცალკე სხვადასხვა ტიპის კორონავირუსში ადრეც გვხვდებოდა, თუმცა პირველად სწორედ ინდოეთში გაერთიანდნენ.
გაეროს ჯანდაცვის სააგენტოს თანახმად, B.1.617 ინდოეთში გასული წლის ოქტომბერში დაფიქსირდა. მიმდინარე წლის 24 მარტს კი ინდოეთის ჯანდაცვის მინისტრმა განაცხადა, რომ ინდოეთში დაფიქსირებული ვირუსის 15-20 % სწორედ ე.წ. ინდურ შტამზე მოდიოდა. 20 მაისის მონაცემებით, COVID-19-ის ინდური ვარიანტი მსოფლიოს 53 ქვეყანაშია.
დაფიქსირდა თუ არა „ინდური შტამი“ საქართველოში? - ამ შეკითხვაზე ზუსტი პასუხი ჯერჯერობით არ არის. თუმცა ცნობილია, რომ საქართველოში მისი შესაძლო შემთხვევების შესწავლა მიმდინარეობს. ამის შესახებ 23 მაისს განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ. მან არ დააკონკრეტა, რამდენ ნიმუშს სწავლობენ სპეციალისტები და როდის იქნება მზად გამოკვლევის პასუხები:
„შესწავლა მიმდინარეობს, მაგრამ დადასტურებული არ გახლავთ. ყველგან არის შესაძლებელი [გავრცელება], საქართველო გამონაკლისი არ არის. მოგეხსენებათ, ევროპაში გამოჩნდა ინდური შტამი, ისევე როგორც ბრაზილიური და სამხრეთაფრიკული. პროგნოზი არის, რომ ინდურმა შტამმა ევროპაში თანდათან ბრიტანული შტამი ჩაანაცვლოს“.
რა ვიცით ინდური შტამის შესახებ? წაიკითხე ნინო თარხნიშვილის სტატიაში.
წითურები ჰყვებიან, როგორ განსხვავდება მათი ცხოვრება სხვებისგან.