პოლონეთსა და ლიეტუვას სურთ, ევროკავშირმა სანქციები დაუწესოს რუსეთის ბირთვულ სექტორს
პოლონეთსა და ლიეტუვას სურთ, რომ ევროკავშირმა სანქციების მეათე პაკეტის ფარგლებში შეზღუდვები შემოიღოს რუსეთის ბირთვული სექტორის წინააღმდეგ. ამის შესახებ Reuters-ი წერს ორი ქვეყნის მაღალი რანგის დიპლომატებზე დაყრდნობით. მათი სიტყვებით, ახალი პაკეტი 24 თებერვლისთვის უნდა იყოს მზად.
როგორც Reuters-ი აღნიშნავს, უკრაინა ადრე უკვე მოუწოდებდა ევროკავშირს კომპანია „როსატომის“ წინააღმდეგ სანქციების დაწესებას. აქამდე ეს ინიციატივა იბლოკებოდა, ძირითადად უნგრეთის მიერ.
პოლონეთი და ლიეტუვა ასევე წინადადებით გამოდიან, აიკრძალოს მეტი „რუსული პროპაგანდისტული მედია“ და მეტი რუსული ბანკი გაირიცხოს სისტემა SWIFT-იდან.
გარდა ამისა, ქვეყნებს სურთ შეზღუდვები შემოიღონ ბელარუსის წინააღმდეგ, რომლის დახმარებითაც, როგორც სააგენტოს რესპონდენტები აღნიშნავენ, რუსეთი ახერხებს ევროკავშირის ზოგიერთი სანქციისთვის გვერდის ავლას. ადრე ევროკომისიის თავმჯდომარემ, ურზულა ფონ დერ ლაიენმა განაცხადა, რომ ევროკავშირი ბელარუსის წინააღმდეგ ახალ სანქციებს შემოიღებს ომში რუსეთის დახმარებისთვის.
ევროპელმა დიპლომატებმა განაცხადეს, რომ ისინი კვლავ შეეცდებიან, ბოლო მოუღონ ალმასებით ვაჭრობას ბელგიასა და რუსეთს შორის, ასევე გააფართოებენ აკრძალვებს ისეთი საქონლით ვაჭრობაზე, რომელიც სამხედრო მიზნებით შეიძლება იქნეს გამოყენებული.
ამჟამად სანქციების სიაში შეყვანილია 1300-მდე ადამიანი და 120-მდე ორგანიზაცია. შეზღუდვები ვრცელდება ვაჭრობაზე, ტრანსპორტზე, ენერგეტიკაზე, საბანკო საქმეზე, მასმედიასა და თავდაცვაზე.