„გავაგრძელებთ პირთა ანგარიშვალდებულების უზრუნველყოფას“ - ბლინკენი

შეერთებული შტატების მიერ ქართველი მოსამართლეების სანქცირების შემდეგ, სახელმწიფო მდივანი ენტონი ბლინკენი აცხადებს, რომ აშშ „გააგრძელებს იმ პირთა ანგარიშვალდებულების უზრუნველყოფას, ვინც პირადი სარგებლის მიზნით, ბოროტად იყენებს საჯარო უფლებამოსილებას“.

ამერიკის შეერთებულმა შტატებმა 5 აპრილს სანქციები დაუწესა საქართველოს 3 მოქმედ და ერთ ყოფილ მოსამართლეს. ესენი არიან:

ლევან მურუსიძე - იუსტიციის უმაღლესი საბჭოს წევრი;

მიხეილ ჩინჩალაძე - თბილისის სააპელაციო სასამართლოს თავმჯდომარე;

ირაკლი შენგელია - ჩინჩალაძის მოადგილე;

ვალერიან ცერცვაძე - იყო თბილისის სააპელაციო სასამართლოს თავმჯდომარე და იუსტიციის უმაღლესი საბჭოს მდივანი.

სახელმწიფო მდივანი ბლინკენის განცხადებაში აღნიშნულია, რომ მათ გაუუქმდათ მოქმედი ვიზები მნიშვნელოვანი კორუფციული საქმიანობის გამო.

„უნდა ველოდოთ თუ არა უფრო მეტი პირის სანქცირებას“? - აშშ-ის საელჩო საქართველოში ამ კითხვაზე პასუხად წერს, რომ „ამერიკის შეერთებული შტატები წინასწარ არ აანონსებს სანქციებს“.

სახელმწიფო მდივანი ბლინკენის განცხადებით, „აღნიშნულმა პირებმა ბოროტად გამოიყენეს მათი თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ“.

ამავდროულად, შეერთებული შტატები მხარდაჭერას უცხადებს დამოუკიდებელ მოსამართლეებს: „ჩვენ ყველა იმ მოსამართლის გვერდით ვდგავართ, ვისაც აქვს გამბედაობა და კეთილსინდისიერება იმოქმედოს მიუკერძოებლად და დამოუკიდებლად“.

ერთ-ერთმა სანქცირებულმა მოსამართლემ, ლევან მურუსიძემ განაცხადა, რომ არ იმსახურებს დასანქცირებას, მაგრამ „ცხოვრება გაგრძელდება“:

„უჰ, არაუშავს... უსამართლობაა, მაგრამ რომ ვთქვა, მუხლები ამიკანკალდა და რამე... არც [საბანკო] ანგარიშები არ მაქვს არსად, პატიოსანი ცხოვრებით მიცხოვრია, კანონი არ დამირღვევია. თუ ახლა აშშ-ში ან ევროკავშირში არ შემიშვებენ, არც ბაბუაჩემს არ უვლია. უცხოვრია ადამიანურად და კაცურად და გადაუტანია“, - განაცხადა მან „მთავარ არხთან“ საუბარში.

აშშ-ის ელჩმა კელი დეგნანმა, თავის მხრივ, განაცხადა, რომ სახელმწიფო დეპარტამენტის გადაწყვეტილება ეფუძნება სანდო ინფორმაციას, რომლის თანახმადაც ეს მოსამართლეები „საჯარო თანამდებობის ბოროტად გამოყენებით ჩართული იყვნენ მნიშვნელოვან კორუფციულ საქმიანობაში“.

ელჩის თანახმადვე, მათ ხელთ არსებული ინფორმაცია აკმაყოფილებს ამერიკული კანონმდებლობით დადგენილ სტანდარტს, რათა არ დაუშვან აღნიშნულ პირთა შესვლა შეერთებულ შტატებში.