„სოლიდარობა ირაკლი ბებუას" - თბილისში, პარლამენტის წინ აქცია მიმდინარეობს
ოკუპირებულ აფხაზეთში დაპატიმრებული საქართველოს მოქალაქის, ირაკლი ბებუას მხარდასაჭერად აქცია მიმდინარეობს თბილისში, პარლამენტის შენობის წინ. „ირაკლი იმსახურებს ჩვენს მხარდაჭერასა და სოლიდარობას", - აცხადებენ შეკრების ორგანიზატორები.
აქციაზე იმყოფება ირაკლი ბებუას ბიძაშვილი თამუნა ბებუა. მან რადიო თავისუფლებას უთხრა, რომ მოთხოვნა არის უცვლელი, ირაკლის სასწრაფოდ გათავისუფლება და საქართველოს კონტროლირებად ტერიტორიაზე გადმოყვანა.
„სახელმწიფოს აქვს ბევრი ბერკეტი, რომ ირაკლი გაათავისუფლოს და ოჯახი მოითხოვს, ბერკეტების გამოყენებას და რეალური ქმედით ნაბიჯებს.
როგორც ხელისუფლების წარმომადგენლები ამბობენ, მოლაპარაკებები მიმდინარეობს მუდმივ რეჟიმში, თუმცა მან რაღაც შედეგამდე უნდა მივყავდეთ. ოჯახი შედეგებს ვერ ხედავს. შესაბამისად, განცდა გვაქვს, რომ რეალური ნაბიჯები არ იდგმება", - გვითხრა თამუნა ბებუამ და დაამატა, რომ დაახლოებით ორი თვის წინ ტელეფონით ელაპარაკნენ ბებუას. შემდეგ კი საკუთარი წყაროებიდან გაიგეს, რომ მისი ჯანმრთელობის მდგომარეობის გაუარესების შესახებ.
„მას აწუხებს ქრონიკული ხერხემლის, თავის და კუჭის ტკივილები და მისი ემოციური მდგომარეობაც ძალიან რთულია", - აღნიშნა თამუნა ბებუამ.
აქციაზე იმყოფებიან ირაკლი ბებუას მშობლები, რომლებსაც კომენტარი არ გაუკეთებიათ.
აქცია მას შემდეგ დაიგეგმა, რაც გავრცელდა ინფორმაცია ირაკლი ბებუას ჯანმრთელობის გაუარესების შესახებ.
„დღეს მისი ჯანმრთელობის მდგომარეობა საგანგაშოდ მძიმეა. მესამე წელია საქართველოს მოქალაქე ჩვენი ეროვნული ღირსების დაცვის გამო საოკუპაციო რეჟიმის უკანონო ტყვეა, თუმცა საქართველოს ხელისუფლება მის გასათავისუფლებლად ქმედით ნაბიჯებს არ დგამს და ოჯახთან მხოლოდ სტანდარტული, შაბლონური დაპირებებითა და ტექსტებით ურთიერთობენ", - ვკითხულობთ აქციის ორგანიზატორთა განცხადებაში.
„ქართული ოცნების" თავმჯდომარემ ირაკლი კობახიძემ განაცხადა, რომ ხელისუფლება ბოლომდე არის ჩართული ირაკლი ბებუას გათავისუფლების საკითხში, თუმცა, მისი თქმით, არის ურთულესი.
„პრაქტიკულად, ყველა სხვა შემთხვევაში მოხერხდა შედეგის მიღწევა, თუმცა ეს არის ის შემთხვევა, სადაც ხელისუფლებისთვის შედეგის მიღწევა რთულია. რა თქმა უნდა, ხელისუფლება ძალისხმევას არ მოაკლებს იმას, რომ აქ შედეგი მივიღოთ. კიდევ ერთხელ ვამბობ, რაც შეეხება ბებუას გათავისუფლებას, ყველაფერი კეთდება იმისთვის, რომ ეს შედეგი დადგეს. თუმცა საკითხი არის რთული“, - განაცხადა კობახიძემ.
2020 წლის 30 სექტემბერს, როდესაც რუსეთის მიერ ოკუპირებული აფხაზეთის დე ფაქტო ხელისუფლება „დამოუკიდებლობისა და გამარჯვების” დღეს აღნიშნავდა, საქართველოს მოქალაქემ ირაკლი ბებუამ გალში, რაიონული კულტურის სახლის ფასადზე „აფხაზეთის დროშა" დაწვა. როგორც ბებუას ახლობლები აცხადებენ, ამ ფაქტის შემდეგ, გალში, ბებუას საცხოვრებელ სახლში ჩატარდა ჩხრეკა, რა დროსაც, ბრალის დამძიმების მიზნით საოკუპაციო რეჟიმის მილიციამ მას ხელყუმბარა „ჩაუდო”.
აფხაზეთის დე ფაქტო რესპუბლიკის სასამართლომ ირაკლი ბებუას 9 წლით თავისუფლების აღკვეთა მიუსაჯა.
აფხაზეთის დე ფაქტო ხელისუფლებას ასევე უკანონოდ ჰყავს დაპატიმრებული საქართველოს კიდევ ორი მოქალაქე ქრისტინე თალაკანძე და ასმათ თავაძე.
ოკუპირებული აფხაზეთის ე.წ. უზენაესმა სასამართლომ 10 წლითა და 6 თვით პატიმრობა მიუსაჯა ქრისტინე თაკალანძეს, რომელსაც "ჯაშუშობაში" ადანაშაულებდნენ.
ქრისტინე თაკალანძეს დე ფაქტო პროკურატურა ბრალად სდებდა 2021 წლის სექტემბრიდან 2022 წლის ივლისამდე საიდუმლო ინფორმაციის მოპოვებას, შეგროვებასა და საქართველოს სახელმწიფო უსაფრთხოების სამსახურისთვის გადაცემას.
დე ფაქტო სამართალდამცველები აცხადებენ, რომ ასმათ თავაძის საცხოვრებელი სახლიდან საქართველოს პასპორტი, სახელმწიფო სიმბოლიკები – დროშა და შევრონი აღმოაჩინეს. თავაძეს, ასევე, ედავებიან 10 გრამზე მეტი ოდენობის ნარკოტიკული საშუალების ფლობას.