Кыргызстанда COVID-19 вирусуна кабылган дарыгерлердин саны 147ге жетти. Алардын басымдуу бөлүгү Жалал-Абад, Ош облустарынын жана Ош шаарынын ооруканаларынан илдетти жугузуп алышкан. Ал эми бул күндөрү Бишкектеги үй-бүлөлүк дарыгерлер борборунун биринде төрт кызматкер вирус жуктурганы аныкталып, ооруканага жаткырылды. Шаардагы №8 үй-бүлөлүк медицина борборунун инфекционист-дарыгери Алтын Токтокожоева дарыгерлердин иштөө шарты, оорулууларды аныктоо, анализ алуу аракеттери, алар туш болгон кыйынчылыктар тууралуу “Азаттык” менен маектешти.
