Ала-Тоонун мекенчил ырчысы жардамга муктаж
Мекен темасындагы ажайып ырларын өзгөчө мукам үн менен ырдап жүргөн таанымал ырчы Султан Каримов катуу ооруп калыптыр деген кабар ар бир мекендешибизди кабатыр кылып, анын тезирээк айыгып кетүүсүн тилеп турган учурубуз. Тагдырга не деп болот, кечээ эле сахнада булбулдай сайрап жүргөн элдик инсан бүгүн мамлекеттин, жалпы коомчулуктун жардамына муктаж болуп олтурат. Жазуучу М.Каримовдун блогу.
Өлкөнүн намысын маданият, музыка, көркөм өнөр жагынан коргогон инсандарга бийлик тарабынан буга чейин жасалып келген мамиле абдан ойлондурат. Чымыр денелүү жигит-кыздарыбыз дүйнөлүк таймаштарда атаандаштарынын оозу-мурдун канжалата муштап же көтөрүп чаап, спорт жаатында чемпион болуп келишсе, аларды дароо кабыл алып, ааламга жар салып, олчойгон стипендия, бир нече бөлмөлүү батирлерди, баалуу белектерди беришүүдө. Башкача айтканда, кара күч чемпиондорун көкөлөтүп баалоо салтка айланып келет. Ал эми эл аралык же дүйнөлүк маданий фестивалдар менен конкурстарда кыргыз маданиятын тааныткан өнөр чеберлери, мыкты калемгерлер, айтор, көркөм дүйнөнүн «чемпиондору» эстен чыгып калууда...
Абал ушундай болуп турганда Кыргызстанда жашаган уйгур туугандардын башын бириктирген «Иттипак» коомдук бирикмеси борбор калаадагы «Ават» кафесинде көрүнүктүү ырчы Султан Каримовдун оор операциясы жана дарылануусу үчүн каржылык жардам көрсөтүү максатында атайын марафон өткөрүп, уюмдун уйгур тилиндеги гезитине төмөндөгүдөй кайрылуусун жарыялады:
“Кыргыз Республикасынын эл артисти Султан Каримов ушул тапта ден соолугу жагынан өтө татаал абалга туш болуп турат. Ал экинчи даражадагы кант оорусу менен жабыркап жатат. Бул оору бөйрөктүн, уйку безинин ж.б. органдардын иштешине да тескери таасирин тийгизген. Ошондуктан ага тез арада Түркияда операция жасалышы керек. Тилекке каршы, операцияга төлөө үчүн анын өзүнүн каржылык мүмкүнчүлүгү жок”.
Белгилүү ырчы Султан Каримов борбор калаага он беш жашында Ысык-Көлдүн Жети-Өгүз районунан келген. Тубаса таланты бар элеттик баланын тилеги ишке ашып, өлкөдөгү биринчи кесипкөй эстрада ансамблине кабыл алынган.
Андан бери арадан кырк жылдан ашуун убакыт өттү. Кыргыз Республикасынын Эл артисти, Т.Сатылганов атындагы Мамлекеттик филармониянын солисти Султан Каримов көптөгөн калктардын элдик жана азыркы учурдагы ырларын кыргыз, уйгур жана дүйнөнүн башка элдеринин тилдеринде ырдаган атактуу жана популярдуу аткаруучулардын бири болуп саналат.
Анын аткаруусундагы мазмундуу ырлар өлкөбүздүн чыгармачыл жаштарынын, эстрада ырларынын Бүткүл союздук жана эл аралык конкурстарында, Москва менен Гаванада болуп өткөн Жаштар жана студенттердин бүткүл дүйнөлүк фестивалдарында жаӊырган.
Кыргыз композиторлорунун чыгармаларын аткаруу жаатында урмат-сыйга ээ болгон бул таланттуу ырчы өлкөнүн көркөм өнөрүн дүйнөгө жайылтуучу катары Монголия, Куба, Конго, мурдагы ГДР, Польша, мурдагы Чехословакия, Корея, Кытай Эл Республикасы, Түркия, Камерун, Болгария, Венгрия, мурдагы Югославия, Индияда жана мурдагы союздук республикаларда концерттик программаларын тартуулаган.
Султан Каримов аткарган Кыргызстандагы түрдүү этностордун ырлары Кыргыз телекөрсөтүүсү менен радионун «Алтын фондуна» киргизилген. Ал өзүнүн музыка өнөрү аркылуу жаштарды мекенчилдикке тарбиялоо, Кыргызстанда жашаган элдердин ынтымагын жана биримдигин бекемдөө ишине чоӊ салым кошкон жана кошуп келатат.
Ушул күндөрү Кыргызстандагы жарандык коомдун өкүлдөрү, «Иттипак» коомдук бирикмеси жана бир катар өнөрпоз жарандарыбыз ырчы Султан Каримовдун Түркияда дарылануусу үчүн каржылык көмөк көрсөтүү өтүнүчү менен жалпы коомчулукка кайрылышты.
Тиешелүү каржылык жардамды Султан Каримовдун Элсом – 0507420542 жеке эсебине которуу жолу да сунушталды.
Ал эми «Иттипак» коомдук бирикмеси тарабынан уюштурулган марафондо ырчынын операциясы үчүн 260 миӊ сомдон ашуун акча каражаты топтолгондугу, Кыргызстандын Өкмөтүнө караштуу Жергиликтүү өз алдынча башкаруу иштери жана этностор аралык мамилелер боюнча мамлекеттик агенттиктин кызматкерлери бир күндүк эмгек акысын которуп бере тургандыгы маалым болду.
Кыргызстандын жарандары сүйүктүү ырчысына кайрымдуулук колдоо көрсөтүү чакырыгын интернеттеги коомдук тармактар аркылуу да таркатып жатышат.
Мирзохалим Каримов,
жазуучу, журналист.