Шум ажал мыкты адисти жана атуулду арабыздан жулуп кетти №43, 01.07.08-ж.
Ушул жылдын 16-июнь күнү чыгаан дарыгер, медицина илимдеринин доктору, кыргыздын мыкты атуулдарынын бири Султангазы Бакир уулу Орозобеков мезгилсиз дүйнө салды.
Ал 1952-жылы Ысыккөл облусунун Түп районундагы Жылуубулак айылында төрөлүп, 1974-жылы Кыргыз мамлекеттик медициналык институттун стоматология факультетин артыкчылык диплому менен бүтүргөн. Ошол жылдан тарта өмүрүнүн акырына чейин медицина тармагындагы илимий изилдөө менен турмуштагы ишин айкалыштыра иштеп, 1981-жылы медицина илимдеринин кандидаты, 2004-жылы медицина илимдеринин доктору деген илимий даражага ээ болду. Анын иш менен илимди айкалыштырган изилдөөлөрүнүн негизинде тубаса эрди жырык жана таңдайы жок төрөлгөн жүздөгөн наристелердин багы ачылып, сүйлөө мүмкүнчүлүгүнө ээ болушту.
Ал эми «Адамдын жаак бетиндеги кыймылдаткыч булчуңдардын кемчилдиктери менен жабырланган этти калыбына келтирүүдө аутоаллогендик трансплантанттарды колдонуу» деген тема менен 2004-жылы жактаган докторлук диссертациясынын негизинде канчалаган адамдардын жүзү калыбына келип, колу жеңил дарыгер Султангазыга кабылгандарына Кудайга ыраазы болушкан. Адамдын жүзүндөгү мүчүлүштүктөрдү калыбына келтирген ондогон операцияларынын негизинде 80ден ашуун илимий эмгек жазып, жаак беттин сөөгүн калыбына келтирүү боюнча илимий монография жаратып, алардын автору катары илимий ачылыш патент да алган.
Маркум Султангазы коомдук иш жаатында да жигердүү мээнет төктү. Ал жалпы кесиптештеринин ишмердүүлүгүн багыттап, алардын илимий жана практикалык иш-аракеттерин, мол тажрыйбасын аймактык жана эл аралык деңгээлде таанытуу максатында коомдук уюмду түзүүнүн демилгечилеринен болду. Талбаган уюштуруу аракеттеринин негизинде Кыргызстандын стоматологдорунун кесиптик ассоциациясын (жамаатын) түзүп, аны өмүрүнүн акырына чейин башкарды. Бул жамааттын курултайлары пост-советтик кыргыз стоматологдорунун тарыхындагы ири окуялардан болуп келди. Бул жамаат чет өлкөлүк башка уюмдар менен да ырааттуу кызматташып, кыргызстандык жаш стоматолог окумуштуулардын Европадагы, КМШдагы жана башка эл аралык илимий жыйындарга катышуусуна, адис катары калыптануусуна жана жаңы сереге көтөрүлүшүнө олуттуу өбөлгө түздү.
Кыргызстандын Саламаттык сактоо министрлигинин стоматология боюнча аттестациялык комиссиясынын төрагасы, стоматологдордун бүткүл дүйнөлүк уюмунун мүчөсү жана Борбор Азияда чыгуучу «Стоматология» аттуу медициналык журналдын редакциялык коллегиясынын мүчөсү катары Султангазынын Кыргызстандын стоматология илимий тармагынын өнүгүшүнө кошкон салымы да өзүнчө тарых болуп калды. Анын ажарын ачкан дагы бир жагдай — интеллектуал катары кыргыз маданиятына, тарыхына кызыгып, Кыргызстандын демократиялык жолдо өнүгүүсүнө ынтызар болгондугу эле. Анын жакын чөйрөсүндө интеллектуалдык баарлашуулар байма-бай жүрүп, ар кыл адистикти аркалаган замандаштары өзүнчө эле билимкөйлүк очогунда жылынып отургандай сезишээр эле. Аттиң, чыныгы дарыгердин, агартуучунун жана коомдук ишмердин билими менен тажрыйбасы бап келип, эли менен шакирттерине насаат берээр көрөңгөсү толуп, адис жана атуул катары кемелине келип турган кезинде жылдызы мезгилсиз өчтү.
Султангазынын өмүрлүк жары, артында калган 3 кызы менен жарык дүйнөгө жаңы келген туягы өксүп, алардын опол тоосу омкорулуп турган чакта аларга терең көңүл айтабыз, эми ал арбагында силерди жана кийинки урпактарын колдосун дейбиз…
Эми өзүнө гана эмес, кесиптештерине да, окуучуларына, шакирттерине жана ал түгүл ноокастап келгендерге да саламаттыкты чыңдоо жаатында талапты жогору койгон, дос-туугандарына дайыма жаркылдап жардамга чуркаган, интеллекти, чыгармачыл дарамети, зиректиги жүзүнөн төгүлүп турган Султангазынын жаркын элеси көптөгөн замандаштарын сагындыраар… Анын Улукмандын колундай эминен айыккан нечендеген мекендештери элесин эскерип өтөөр… Ылайым ал негиздеген коомдук жана илимий жамааты өз багытынан жазбай көчтү уланта берсе экен, ылайым ал айыктырган тестиерлер, улан-кыздар эл-жеринин мыкты өкүлү болуп жетилсе экен!
Т.Абдыраимов, Д.Адамбеков, А.Акунов, Т.Акун, Н.Алдаяров, М.Арстанбеков, Ү.Асанов, Г.Ашакеева, Е.Баялинова, Т.Борончиев, Б.Давлетов, Р.Дайыров, Т.Дооров, Б.Досалиева, Ш.Дүйшеев, А.Жапаров, Р.Исаев, А.Калбаев, Р.Калиев, Ж.Каниметов, М.Каратаев, О.Каратаев, О.Касымов, М.Кожобеков, А.Койчиев, Б.Көбөйбаев, К.Култегин, М.Мамакеев, М.Мамбетов,А.Мокеев, К.Молдокасымов, И.Молдоташев, М.Мүсүралиев, Т.Оморов, К.Оторбаев, А.Отунчиева, А.Өзүбеков, Б.Сарыгулова, С.Сыдыкбеков, А.Ташкенбаев, Ж.Темирбаева, Т.Турганбаев, У.Тыналиев, А.Усманов, К.Чекиров, M.Чолпонбаев, Т.Чоротегин, Т.Чубаков, Б.Шамшиев, А.Эшиев, И.Юлдашев.
«Dе-факто» гезитинин эмгек жамааты «Азаттык» радиосунун кабарчысы Мээрим Султангазыга атасы
Султангазы Орозобековдун
дүйнө салгандыгына байланыштуу терең кайгыруу менен көңүл айтып, аза кайгысын тең бөлүшөт.