Иран атомдук программасын мындан ары да кеңейтерин эскертти
Ирандык маалымат каражаттары кабарлагандай, 28-ноябрда Лиссабондо сүйлөгөндө министр Иранда бомба жасоо үчүн техникалык ноу-хау бар, бирок аны чыгаруу "өлкөнүн коопсуздук стратегиясына кирбейт" деп айтты.
Мындай билдирүү Ислам жумурияты менен Британия, Франция жана Германиянын Женевадагы сүйлөшүүлөрүн утурлай жасалды. Кездешүүдө бир катар маселелер, арасында Тегерандын ядролук программасы жана Жакынкы Чыгыштагы жаңжал талкууланмакчы.
Аракчи ал жыйын азыркы ядролук туңгуюктан чыгуу "жолдору бар-жогун аныктоону" көздөөрүн билдирди.
Женевадагы жолугушуу ядролук сүйлөшүүлөр деп сыпатталбаганы менен Ирандын атомдук программасы негизги тема болот деп күтүлүүдө.
Өткөн аптада Атомдук энергия боюнча эл аралык агенттиктин (МАГАТЭ) башкаруучулар кеңеши Иранга каршы резолюция кабыл алып, ал өлкөнүн кеңейип жаткан ядролук программасынын абалына “ар тараптуу баа берүүнү” тапшырган.
Анын жыйынтыгы 2015-жылкы келишимдин алкагында алынып салган санкцияларды калыбына келтирүүгө жол ачышы ыктымал.
Иран жана алты держава (Кытай, Орусия, Улуу Британия, Франция, АКШ + Германия) ал жылы түзгөн келишимге ылайык, Тегеран өзөктүк программасын чектейт, ага жооп катары АКШ Ислам жумуриятына салынган экономикалык санкциялардын көбүн алып салган. Дональд Трамптын тушунда, 2018-жылы Вашингтон келишимден чыгып кеткен.
Иран буга атомдук программасын кеңейтүү менен жооп кайтарган.
Келишимди калыбына келтирүү боюнча сүйлөшүүлөр 2022-жылы токтоп калган.