Жаңы жылдан тартып маркирленбеген күйүүчү майды сатууга тыюу салынат
Мекеменин эскертүүсүнө ылайык, мунайзаттарды жүгүртүү менен алектенген ишканалар 2024-жылдын 31-декабрына чейин отундун бул түрлөрүнүн калдыктарын маркирлөөгө тийиш.
2024-жылдын 1-октябрынан тартып Кыргызстанда молекулярдык маркерлерди колдонуу менен импорттолуучу жана өндүрүлгөн күйүүчү майды милдеттүү түрдө маркирлөө жобосу киргизилген.
Салык кызматы күйүүчү майды маркирлөө оператору - "Учкун" басмаканасы менен чогуу жыл аягына чейин 230 миң тонна бензин жана дизелдик отунду маркирлөөгө милдеттендирилген.
Мамлекеттик салык кызматы билдиргендей, маркирлөө системасы киргизилгенден кийин ноябрь айында күйүүчү-майлоочу материалдарга акциз салыгынын төлөмдөрүнү суммасы өткөн жылдын ушул мезгилине салыштырмалуу 59%га көбөйүп, 349,5 млн сомду түзгөн.
1-октябрдан тарта Кыргызстанда күйүүчү майды милдеттүү маркирлөө ыкмасы киргизилип, ага байланыштуу ар бир литр күйүүчү майга кеминде 37 тыйын кошулган. Ошондой эле кыргыз өкмөтүнүн сунушу менен жаңы жылдан - 1-январдан тарта жолго төлөнүүчү салык - 1 сом да күйүүчү майдын жана газдын баасына кошулат.(ZKo)