УКМК Бишкек шаардык сотунун судьясы жубайы менен кармалганын билдирди

Улуттук коопсуздук мамлекеттик комитети Бишкек шаардык сотунун жазык коллегиясынын судьясы жана анын жубайы лдамчылыкка шектелип кармалганын билдирди. Атайын кызматтын 18-декабрдагы маалыматына караганда, судьянын жубайы жарандан 2 миң АКШ долларын талап кылып, бул каражатты электрондук капчык аркылуу котортуп алган.


Ал жолдошунан Бишкек шаардык сотунун жарандык иштер боюнча коллегиясынын судьясы менен байланышууну, анын кароосундагы ишти акча берген кишинин пайдасына чечип берүүнү өтүнгөн.


Ишти караган судья анын суранычын аткаруудан баш тарткан.  




“Жүргүзүлгөн иш-чаралардын жыйынтыгы боюнча, КР жараны М.Г.М. Кылмыш-жаза процессуалдык кодексинин 96-беренесине ылайык, УКМКнын убактылуу кармоочу жайына киргизилди. Ал эми Бишкек шаардык сотунун судьясы А.А.Б.га карата чогултулган материалдар Соттор кеңешине караштуу Тартип комиссиясына жөнөтүлүп, алар 18-декабрда кылмыш жоопкерчилигине тартууга макулдук беришти”, - деп жазылган маалыматта.


УКМК шектүүлөрдүн бөгөт чарасы Бишкектин Биринчи май райондук сотунда караларын билдирди.


Бишкек шаардык соту, Соттор кеңеши, шектүү тарап жана алардын адвокаттары комментарий бере элек. (TAb)