Исхак Раззаков орденин негиздөө сунуш кылынды
Мыйзам долбоорунда бул орден менен мамлекеттик башкаруу жана муниципалдык кызматта таза иштегендер сыйланат деп жазылган.
“Мыйзам долбоору менен мамлекеттик жана муниципалдык кызматта, ак ниет, таза эмгектенген кызматкерлерди жана өндүрүштө ири долбоорлорду ишке ашырган жарандарды колдоо жана кубаттоо максатында “Исхак Раззаков” орденин негиздөө сунушталып жатат”, - деп айтылат негиздеме катында.
Мыйзам кабыл алынса, “Исхак Раззаков” ордени төштүн сол тарабына “Манас” орденинен кийин тагылат.
Кыргыз Республикасынын Баатыры Исхак Раззаков 1910-жылы 25-октябрда Лейлек районунда туулган. Он жыл Кыргызстандын Компартиясын, бир топ жыл Министрлер кабинетин жетектеген. 1961-жылы кызматынан бошотулуп, Москвага которулган. Ошол жерде иштеп, эс алууга чыгып, 1979-жылы каза болгон. Ал жетектеген убакта Кыргызстанда өнөр жай өндүрүшү жанданып, социалдык тармакта көп ийгиликтер болгон. (TSh)