Кыргызстанда никеге 18 жаштан кийин гана уруксат берүү сунушталды
Долбоордо “18 жашка чыга элек адамдардын никеге туруусуна толук тыюу салуу” каралган. Анын ичинде 17 жашында никеге турууга уруксат алуу мүмкүнчүлүгүн жокко чыгаруу сунушталган.
Мыйзамдын негиздеме катында белгиленгендей, Үй-бүлө кодексинин долбоорунун кайра иштелип чыккан версиясы сегиз бөлүктөн турат.
Учурдагы Үй-бүлө кодексине ылайык, нике курагы 18 жаш. Бирок жүйөлүү себептер болгон учурда каалоочулардын өтүнүчү менен комиссиялык корутундунун негизинде нике курагы бир жылга төмөндөтүлөт.
Бул жашы жете элек кыздарды эртелеп никеге турууга мажбурлоого алып келип жатканы айтылып келаткан.
Кыргызстандын мыйзамдарына ылайык эрте куракта никеге турууга мажбурлоо, аны каттоо же ага колдоо көрсөтүү кылмыш болуп эсептелет.
Улуттук статистика комитетинин маалыматтарына ылайык Кыргызстанда дээрлик ар бир төртүнчү нике бузулат.
Мыйзам долбоору 31-январга чейин коомдук талкууда турат. (KbA)