Бишкекте көп кабаттуу үйдөн өрт чыгып, жашоочулар эвакуацияланды
110 батири бар 13 кабаттуу турак жайдын 13-кабатынан чыккан өрт үйдүн чатырына да жайылган. Бир подъезддин 60тай жашоочусу толугу менен эвакуация болгон. Кырсыктан жабыркагандар жок. Өрттүн жалпы аянты болжол менен 500 чарчы метрди түздү.
Тилсиз жоону өчүрүүгө Биринчи май жана Октябрь райондук өзгөчө кырдаалдар бөлүмдөрүнөн беш күжүрмөн эсеп, үч автошаты тартылды.
Расмий маалымат боюнча, Кыргызстанда 2023-жылы баш-аягы 3 497 өрт кырсыгы катталып, андан 35 адам каза болуп, 31 киши жаракат алган. Тилсиз жоо 1 млрд 410 млн 377 миң сом материалдык зыян алып келген. 2024-жылы болгон өрт кырсыктары тууралуу маалымат бериле элек. (BTo)