Жалал-Абад шаарында ишкерлерден акча талап кылууга шектелген блогер кармалды
Маалыматта кармалган жаран өзүн журналисттик иликтөөлөрдү чагылдырган блогер катары тааныштырып, бизнес өкүлдөрүнөн опузалап акча талап кылгандыгы баяндалат.
“О.Ж.С. аттуу кармалган жаран И.Ч.И. аттуу ишкерди Жалал-Абад облусунун Сузак районундагы базарлардын биринин ижарачыларынан “ижара акысын мыйзамсыз жыйнаган” деп айыптап, шантаж жана журналисттик иликтөө жүргүзүү опузасы менен коркутуп, андан кийин интернет тармактарга материалдарды жарыялоо жолу менен жабырлануучудан бир нече жолу ири суммадагы акча каражаттарын алган”, – деп айтылат УКМКнын билдирүүсүндө.
УКМК Жазира Осмонова буга чейин кармалган блогер Айка Мусаева менен жакын байланышта болгонун тактап, алардын ушул сыяктуу башка фактыларга тиешеси бар-жок экендиги текшерилип жатканын кошумчалайт.
Атайын кызмат социалдык тармактарда "Айка Мусаева" деген ат менен катталган С.А.М аттуу блогер кармалганын 18-январда билдирген. Мекеме ал буга чейин Жалал-Абаддын Сузак районундагы айрым ишкерлерди жана колунда бар адамдарды социалдык тармактар аркылуу жаманатты кыларын айтып коркутуп, акча талап кылып келгенин кабарлаган.
Кармалган жарандардын жакындары жана жактоочулары соңку окуя тууралуу азырынча комментарий бере элек. (ErN)