Балдар менен иштеген социалдык кызматкерлердин саны көбөйтүлдү
Мамлекет башчынын сайтына 30-январда чыккан маалыматка ылайык, жаңы 550 штаттык бирдик киргизилди жана ал кызматкерлер турмуштук оор кырдаалга кабылган балдар менен иштейт.
“Жаңы социалдык кызматкерлер балдардын укуктарын жана кызыкчылыктарын коргоп, катаал мамилеге, зордук-зомбулукка жана кайдыгерликке ыкчам жооп кайтарышат, ошондой эле алардын алдын алуунун үстүндө иштешет. Алардын иш-аракеттери ар бир баланын жашоосу жана өнүгүүсү үчүн коопсуз шарттарды түзүүгө багытталган. Ушул жылдын 1-февралынан тартып региондордо иштеп, колдоого муктаж балдарга даректүү жардам көрсөтө турган адистерди кабыл алуу жана даярдоо этабы башталат”, - деп жазылган маалыматта.
Эмгек, социалдык камсыздоо жана миграция министрлигинин маалыматына ылайык, мекеменин шаардык, райондук жана район аралык башкармалыктарында 892 социалдык кызматкер эмгектенет.
Жыл башындагы маалыматка караганда, алар 8 986 жарандын үйүнө барып кызмат көрсөтүшөт. (TAb)