Вашингтондо кырсыктаган жүргүнчү учакта орусиялык спортчулар да болгону кабарланды
Маалыматты Орусиянын мамлекеттик ТАСС агенттиги жана спорт жаңылыктарын чагылдырган Sports.ru сайты өз булактарына таянып жазышты. Наумов менен Шишкова 1994-жылы өткөн Дүйнө чемпионатында алтын медаль тагынышкан.
Кырсык 29-январда жергиликтүү убакыт боюнча 21.30дарда болгон. Пентагондон алыс эмес жерде жүргүнчү учак менен аскердик тик учак кагышып, лайнер Потомак дарыясына кулап түшкөн.
American Airlines компаниясы эксплуатациялап келген учактын ичинде 64 адам бараткан. Ал эми Black Hawk тик учагында үч аскер кызматкери болгону ырасталды.
Наумов менен Шишкова муз үстүндө көркөм бийлөө боюнча спорттук карьерасын жыйынтыктагандан кийин Кошмо Штаттарга көчүп кетип, машыктыруучу болуп иштеп жүрүшкөн. Алардын 23 жаштагы уулу Максим Американын жараны жана ал өлкөнүн атынан эл аралык мелдештерге катышып жүрөт. 2022-жылы ал өспүрүмдөр арасында АКШ чемпиону болгон.
CBS News полиция кызматкерине таянып, кырсыктан кийин кеминде 18 адамдын сөөгү табылганын кабарлады.
Вашингтон полициясы социалдык тармактар аркылуу куткаруу операциясына бир нече мекеме тартылганын кабарлады. Рональд Рейган атындагы аэропортто бардык аба каттамдары убактылуу токтотулду.
АКШ президенти Дональд Трамп "үрөй учурган кырсык" тууралуу кабардар экенин айтып, куткаруу операциясына катышып жаткандарга ыраазычылык билдирди. Ал кырдаалга көз салып жатканын жана окуянын чоо-жайы тууралуу бөлүшүп турарын кошумчалады.