Трамп Вашингтондогу учак кырсыгында эч ким тирүү калбаганын бышыктады
"Тилекке каршы аман калгандар жок", - деген Америка президенти өз билдирүүсүн каза болгондорду эскерүү үчүн бир мүнөттүк аза күтүүдөн баштады.
Трамп түнү менен "издөө-куткаруу иштери жүргүзүлгөнүн, ага бардык ресурстар тартылганын" кошумчалады.
Ал авиациядагы коопсуздук стандарттары начар деп, мурдагы президенттер Барак Обама менен Жо Байденди сындап өттү.
АКШнын Жарандык авиация боюнча федералдык башкармалыгы (FAA) жергиликтүү убакыт боюнча кечки саат 9 чамасында PSA Airlines авиакомпаниясынын жүргүнчү учагы жерге коно баштаган учурда Sikorsky UH-60 Black Hawk тик учагы менен кагышканын маалымдады.
Учак American Airlines авиакомпаниясынын каттамын аткарып, Вашингтонго Канзас штатындагы Вичита шаарынан учуп барган.
Лайнерде 64, ал эми тик учакта үч аскер кызматкери болгону маалымдалды.
Учакта муз үстүндө көркөм бийлөө боюнча дүйнө чемпиондору, орусиялык спортчулар Вадим Наумов менен жубайы Евгения Шишкова да болгону ырасталды. Наумов менен Шишкова 1994-жылы өткөн Дүйнө чемпионатында алтын медаль тагынышкан.