Тбилисинин экс-мэри баштаган демонстранттар жол торогону үчүн айыпталууда
Ички иштер министрлиги айыпталып жаткандар 2-февралда эскертүүлөргө карабай акция маалында эл аралык маанидеги кан жолду бөгөттөгөн деп билдирди. Күнөөлүү деп табылса, алар 4 жылга чейин эркинен ажыратылышы ыктымал.
“Эхо Кавказа” сайты жазганына караганда, 31-январда башкаруудагы “Грузин кыялы” партиясы мыйзамга өзгөртүү киргизип, “ички жана эл аралык маанидеги жолдорду” стратегиялык жайлардын катарына киргизген.
Ички иштер министрлиги жолду тороого катышкан калган адамдарды аныктоо аракети жүрүп жатканын кошумчалады.
2-февралдагы акцияда 31 демонстрант кармалган.
Грузияда былтыркы күздөн бери бийликке каршы нааразылык тынчыбай жатат.
“Грузин кыялы” партиясы Тбилисинин Евробиримдикке кошулуусу боюнча сүйлөшүүлөрдү 2028-жылга чейин токтото туруу чечимин жарыялаганда өлкөдө акциялар тутанган.
Демонстрациялар күч менен таркатылып, жүздөгөн адам кармалган. Акциялардын катышуучуларын полиция уруп-сабаган фактылар катталган.
Саясий кризис ага чейин эле "Грузин кыялы" партияcы октябрдагы шайлоодо жеңгенден бери курчуган. Оппозиция жана эл аралык байкоочулардын баамында, ал шайлоо добуштарды сатып алуу, бурмалоо, коркутуп-үркүтүү жана зордук-зомбулук фактылары менен коштолгон.