ӨКМ жетекчилердин атын атаган алдамчылар пайда болгонун эскертти
"Министрликтин жетекчилеринин сүрөтүн коюп, аты-жөнүн жазып, министрликтин кызматкерлерине бейтааныш номерлер аркылуу түрдүү шылтоолор менен тапшырмаларды берип жатат. Эгер сиз ушундай учурга кабылсаңыз, сөзсүз түрдө жетекчиге түз чыгып, маалыматты тактап алыңыз",-деп жазылган маалыматта.
Буга чейин Ички иштер министрлиги дагы жетекчилеринин сүрөттөрү колдонулган жалган жарнамалык билдирүүлөр тарап жатканын билдирген. Буга байланыштуу кылмыш иши козголуп, бир адам кармалганын кабарлаган, тинтүү учурунда банк карталары, уюлдук компаниялардын 90 даанадан ашык сим-карталары, сим-бокс жабдуулары табылып, алынганын маалымдаган.
Улуттук коопсуздук комитети телефон чалып, өзүн атайын кызматтын өкүлү катары тааныштырып, шылуундук кылгандар тууралуу билдирүү таратып, жарандарды аларга алданбоого чакырган.
Кыргызстанда соңку учурда интернет, телефон аркылуу шылуундарга алданып калган, ири суммадагы акчасынан кол жууган учурлар көбөйдү.
Сим-бокс (SimBox) - бул уюлдук байланыш тармагын алдап, эл аралык чалууларды жергиликтүү деп жашыруу үчүн колдонулуучу шайман. Алдамчылыктын бул ыкмасын шылуундар көбүнчө эл аралык чалууларды ички же акысыз чалуулардын баасына жасоо үчүн колдонушат.