Шаардык сот Султанбековдун кармалганы боюнча прокуратурага каршы арызды четке какты
Буга чейин жактоочулар Султанбековго кылмыш иши мыйзамсыз козголуп, талапкер макамына карабай айыпталуучу катары жоопко тартуу токтому чыкканы жана мыйзамсыз кармалганына прокуратура кызматкерлери чара көргөн эмес деген негизде Свердлов райондук сотуна арызданган. Сот арызды канааттандырган эмес.
Султанбеков 2024-жылы 13-ноябрда "добуш сатып алуу" беренесине байланышуу козголгон кылмыш иштин негизинде камалган.
Ал дооматтардын баарын четке кагып, кармалган күндөн бери саясий ачкачылык кармап жатканын жарыялаган жана муну "мыйзамсыз иштерге каршылык" деп түшүндүргөн. Ошондон бери анын саламаттыгы начарлап жатканы айтылган. Жаза аткаруу кызматы Султанбековдун ден соолугу көзөмөлдө экенин билдирип келет.
Бишкектеги Свердлов райондук соту 8-февралда "Социал-демократтар" партиясынын лидери Темирлан Султанбековдун жана аталган партиянын мүчөлөрү Ирина Карамушкина менен Роза Түрксевердин абактагы мөөнөтүн 13-мартка чейин узартты. (MkT)