Рим папасы Францисктин ден соолугу начарлап кеткени кабарланды

Бронхит диагнозу менен Римдеги ооруканага жаткырылган Рим папасы Францисктин ден соолугу начарлап кеткендигине байланыштуу дарылануусу белгисиз мөөнөткө узартылмай болду. Бул тууралуу 17-февралда Ватикандын маалымат кызматы билдирди.


Рим папасы дарыгерлердин сунушу менен шаршембиге белгиленген ауденциядан дагы баш тартты. Ага дем алуу органдарынын полимикробдук инфекциясы деген диагноз коюлуп, дарылоо планы өзгөртүлдү.


Ватикан дүрбөлөңгө түшүүгө негиз жок экенин билдирди. "Франс-Пресс" агенттиги өз булагына таянып жазгандай, Францисктин ден соолугу анын көп иштегенинен улам начарлап кеткен.




Понтификтин басма сөз катчысы Маттео Бруни билдиргендей, ал түндө тынч уктап, эртең менен тамактанып, адаттагыдай эле гезит окуган. "Ал жакшы маанайда", – деп айтты ал.


88 жаштагы понтифик 14-февралда Римдеги Gemelli ооруканасына жаткырылган.


Маалыматка караганда, ал ушуну менен акыркы төрт жылда төртүнчү ирет ооруканага түшүп жатат. Ден соолугундагы маселелерге карабастан, Франциск расмий жолугушууларды улантып, ал тургай узак чет элдик сапарларга да барат.


Аргентиналык понтифик 12 жылдан бери Рим-католик чиркөөсүн жетектеп келет.