Орусияда кафеде өрт чыгып, Кыргызстандын беш жараны жабыркады
Бул тууралуу Тышкы иштер министрлиги (ТИМ) 18-февралда билдирди.
Маалыматка караганда, кыргызстандык жарандардын бири оор абалда ооруканага жаткырылган. Экөө Ленинград облустук ооруканасынын күйүк борборунда дарыланууда, дагы экөө алгачкы медициналык жардам алгандан кийин амбулатордук дарылоого жиберилген.
Кыргызстандын Ленинград облусундагы Башкы консулдугу жабыркаган жарандардын жакындары менен тыгыз байланышта экени жана бул маселени көзөмөлгө алганы кошумчаланды.
ТИМдин маалымдашынча, Орусиянын Тергөө комитети кафедеги өрт боюнча кылмыш ишин козгоду.
Ленинград облусунун Усть-Луга аймагындагы чайханада газ баллон жарылып өрт чыкканын, андан бир нече адам жабыркаганын, оор абалдагы үч киши Кыргызстандын жарандары экенин жергиликтүү маалымат каражаттары жазып чыгышкан.
ТИМдин маалыматына ылайык, 2025-жылдын 1-январына карата Орусияда 334 миңдей кыргызстандык жаран миграцияда жүрөт. (ZKo)