УКМК Ленин райондук сотунун судьясын пара алууга шек санап кармады

Улуттук коопсуздук боюнча мамлекеттик комитети (УКМК) Бишкек шаарынын Ленин райондук сотунун судьясы пара алууга шектелип кармалганын билдирди.


Атайын кызмат шектүү адвокат аркылуу жарандык иш боюнча оң чечим кабыл алуу үчүн 22 миң доллар акча алганы аныкталганын кабарлады.


Башкы прокуратура судья жана адвокатка Кылмыш-жаза кодексинин 337-беренеси ("Жооптуу кызмат адамы тарабынан ири өлчөмдө пара алуу") боюнча кылмыш ишин козгогон. Учурда тергөө иштери уланып жатат.


“Ыкчам-иликтөө иш-чараларынын натыйжасында коррупциялык схеманын бардык катышуучулары күнөөсүн моюнуна алышкан”, - деп айтылат УКМКнын билдирүүсүндө.




Судьялар кеңеши 13-февралда башкы прокурордун Бишкектин Ленин райондук сотунун судьясын (А.М.А.) кылмыш жоопкерчилигине тартууга уруксат берген.


Шектүүлөрдүн жактоочулары жана жакындары кылмыш иши боюнча комментарий бере элек.


Жергиликтүү сайттар Ленин райондук сотунун судьясы Мирзат Авазов кармалганын жазып жатат. (TSh)