Ташиев кыргыз-тажик чек арасы боюнча бардык иштер бир ай ичинде аяктарын айтты
“Анан президенттер кол коёт. Андан соң кайра Жогорку Кеңешке алып кирип, жыйында ратификациядан өткөрөбүз. Ратификацияланган мыйзамдарга президенттер кол коюп, ишке кирет. Бул жумуштардын баары бир айдын тегерегинде бүтөт”, - деди Ташиев.
Ал чек ара маселеси аягына чыккандан кийин Баткен облусун өнүктүрүү программасын кабыл алып, облустун экономикалык өнүгүүсүнө басым жасала турганын кошумчалады.
Ташиев ушул күнү Баткен шаарында аянты 100 миң чарчы метрди түзгөн, 10 миң көрүүчүгө ылайыкташтырылган стадиондун курулушунун башталышына катышты. Стадиондун аймагында футбол талаасынан сырткары үч машыгуу оюн аянтчасы жана төрт кичи футбол аянтчасы болот. Ошондой эле 100 кишиге ылайыкташкан жатакана да салынат.
21-февралда кыргыз-тажик чек арасын делимитациялоо жана демаркациялоо боюнча эки өлкөнүн өкмөттүк делегацияларынын тең төрагалары Камчыбек Ташиев менен Саймумин Ятимов комиссиялар толук макулдашууга келгенин жарыялашкан.
Анда үч документ - Кыргызстан менен Тажикстандын ортосундагы кыргыз-тажик мамлекеттик чек арасы жөнүндө келишим, эки мамлекет ортосундагы автомобиль жолдорун куруу жана пайдалануу, автомобиль жолдорунун кесилишин жайгаштыруу жана пайдалануу жөнүндө макулдашуу, эки өлкө өкмөттөрүнүн ортосундагы суу чарба жана энергетикалык объекттерге жетүүнү камсыз кылуу боюнча макулдашуу долбоорлору кабыл алынган.
Эми бул үч документ эки мамлекеттин парламенттеринде ратификациядан өтүп, аларга президенттер кол коюшу керек.
Эки өлкөнүн чек арасынын жалпы узундугу 972 чакырым. Чек ара такталбагандыктан буга чейин суу, жер, жол, жайыт талаштан улам аймакта көп чыр-чатак чыккан. 2021-жылы апрель-май жана 2022-жылы сентябрь айларында кандуу кагылышуулар болгон.