Былтыр Кыргызстан коңшу өлкөлөрдөн 3,6 млрд кВт/c электр энергиясын сатып алды

Кыргызстан 2024-жылы коңшу өлкөлөрдөн 3,6 млрд киловатт-саат электр энергиясын импорттоду. Бул тууралуу Энергетика министрлигинин 26-февралдагы 2024-жылдын жыйынтыгы боюнча өткөргөн коллегиясында айтылганын мекеменин басма сөз кызматы кабарлады.


Маалыматка караганда, өткөн жылы республика боюнча жалпы керектөө 18,3 млрд киловатт-саатты түздү. ГЭСтерден 12,7 млрд кВт/c, Жылуулук электр борбордон 1,76 млрд кВт/c электр энергиясы өндүрүлдү. Мындан тышкары жеке чакан ГЭСтерден 156 млн кВт/c, Күн электр станцияларынан 0,17 млн кВт/c өндүрүлдү.



Кыргызстан былтыр болжол менен 17,5 млрд киловатт-саат электр жарыгын колдонот деп эсептеген. Анын 14,8 миллиарды гана өлкөдө өндүрүлөт. Калган айырманы импорттун эсебинен жабууга туура келет.


Өткөн жылы Кыргызстан келишимдерге ылайык, 3,2 млрд кВт/саат электр энергиясын Түркмөнстан, Казакстан, Өзбекстан жана Орусиядан импорттой турганы айтылган.



2024-жылдын соңунда президент Садыр Жапаров жер-жерлерде электр энергиясынын өчүрүлүшү тууралуу түшүндүрмө берип, жарандарды жарыкты үнөмдүү пайдаланууга чакырган. Ал электр энергиясын колдонуунун көлөмү көбөйгөнүн, бул муктаждыкты чечүү үчүн 3-4 жыл керектелерин "Кабар" мамлекеттик агенттигине курган маегинде белгилеген. (КЕ)