Мамбеталиев өкмөт үйүн тарыхый мурастардын тизмесинен чыгаруу боюнча чечим жок экенин билдирди
Бул тууралуу Жогорку Кеңештин 26-февралдагы жыйынында депутат Исхак Масалиев суроо узатты.
“Жакында Абдумомунов көчөсүндөгү 205 жана 207-даректеги имараттар тизмеден чыгарылды деген маалымат тарады. Президенттин администрациясында жыйын өтүп, берилгени айтылып жатат. Сизге чейин иштеген министр (ред:-Алтынбек Максүтов) расмий түрдө каршы деп айтчу эле. Бирок акыркы добуш берүүдө кандай болгонун билбейм. Сиздин ушул эки имарат боюнча позицияңыз кандай?”, - деди Масалиев.
Министрлик кызматка талапкер Мамбеталиев азырынча бул боюнча комиссия иш алып барып жатканын, имараттарды тизмеден чыгаруу боюнча так чечим жок экенин тактады.
Буга чейин президенттин иш башкармалыгы шаардын чок ортосундагы Өкмөт үйү, Жогорку сот жана башка мекемелер жайгашкан 15 имаратты аталган тизмеден чыгарууну сунуштаганы белгилүү болгон жана бул талаш-талкуу жараткан.
Бул боюнча президенттин тапшырмасы менен 63 адамдан турган атайын комиссия түзүлгөнүн бул топко кирген тарыхчы Кыяс Молдокасымов “Азаттыкка” билдирген. Комиссия көпчүлүк добуш менен тизмеден чыгарылбасын деген чечим кабыл алганын ага карабай 17-февралда Ынтымак-Ордодогу жыйында башка протокол бекип калганын айткан.
Тарыхый, маданий мурас деп саналган имараттар “Тарыхый-маданий мурастарды коргоо жана пайдалануу жөнүндө” мыйзамынын негизинде жөнгө салынат. Документке ылайык, бул жайларды тизмеден чыгаруу үчүн өзүнчө мыйзам кабыл алынышы керек.