Мамлекеттик “Кыргызлото” компаниясынын жетекчиси пара алууга шек саналып кармалды
Атайын кызматтын маалыматына ылайык, ал өлкөнүн лотереялык ишмердүүлүгүн өнүктүрүүгө каражат салуу сунушун берген инвесторлордон 10 миң доллар талап кылган деп шек саналууда.
3-мартта козголгон кылмыш ишинин алкагында “Кыргызлотонун” жетекчиси 10 миң доллардын бир бөлүгүн пара катары алып жаткан жеринен кармалып, УКМКнын убактылуу кармоочу жайына камалганы кабарланды.
“Мамлекеттик лотерея компаниясы” ишканасынын директорунун жакындары же адвокаты, компаниянын өзү коюлган кине боюнча комментарий бере элек.
УКМК Кыргызстанда коррупциялык кылмыш иштерине жаза күчөтүлгөнүн эскертти. Президент Садыр Жапаров 2024-жылы 31-декабрда коррупцияга айыпталгандарга жазаны күчөтүү тууралуу мыйзамга кол койгон. Ага ылайык, “Коррупция” беренеси менен соттолгондорго мамлекеттик кызматта иштөөгө өмүр бою тыюу салынат.
Кылмыш-жаза кодексинин “Коррупция” жана “Шалаакылык” беренелери менен айып тагылгандар күнөөсүн мойнуна алуу боюнча тергөө менен келишим түзүп, келтирилген чыгымды толугу менен төлөгөндө ушул беренелерде каралган жазанын жарымын абакта өтөшү керек. Шектүү күнөөсүн мойнуна алса да пробациялык жаза колдонулбайт. (BTo)