Пакистан Ооганстандын чоң шаарларына сокку урду. Исламабад кошуна өлкөнүн талибдер бийлиги менен "ачык согушка" өткөнүн жарыялады. Эки өлкөнүн чек арасындагы кырдаал бир нече айдан бери чыңалып, улам бир тилкесинде кармаш жүрүп жаткан. Бейшембиде талибдер өкмөтү Пакистандын чабуулуна жооп кайтарып, чек аранын айрым райондорунда операция баштаганын маалымдаган. Исламабад бир топ жылдан бери кошуна өлкөсүн «Техрик-е-Талибан Пакистан» уюмунун согушкерлерине башпаанек бергени үчүн айыптап келет. Талибдер дооматты четке кагууда. БУУ соңку окуяларга тынчсыздануусун билдирип, сүйлөшүүгө чакырды.
