"Кумтөр Голд Компани" былтыр 1,434 млрд доллар киреше тапканын жарыялады

Кумтөр алтын кенин иштетип жаткан “Кумтөр Голд Компани” ишканасы 2025-жылы 1 млрд 434 млн доллар киреше тапты. Анын ичинен 706 млн доллар таза пайда. Бул тууралуу аталган ишкана 9-апрелде билдирди.

Былтыркы жылы салыктарга жана милдеттүү төлөмдөргө 246 млн 507 миң доллар сарпталганы, дивиденд 300 млн доллар түзгөнү маалымдалды.

“Кумтөр Голд Компани” 2025-жылы 12 тонна 81 кг алтын өндүргөн.

Мындай көрсөткүчтөр, ишкана белгилегендей, "компаниянын туруктуу ишин жана өлкө экономикасына кошкон салымын көрсөтөт”.

Маалыматта ошондой эле эл аралык көз карандысыз Ernst&Young аудитордук компаниясы "Кумтөр Голд Компанинин" 2025-жылга финансылык отчетун текшерип, тастыктаганы кабарланды.

Кыргыз өкмөтү 2021-жылы кенди толугу менен мамлекеттин колуна алган.

Быйыл февралдын соңунда “Ынтымак Ордодо” өткөн республикалык кеңешмеде президент Садыр Жапаров 2021-жылдан бери кендин кирешеси көбөйүп, өлкө экономикасын алдыга сүрөп жатканын билдирген. Кен мамлекетке өткөндөн берки аралыкта өндүрүштөн түшкөн жалпы киреше 5 млрд 115 млн доллар же 440 млрд сомдон ашканын, бюджетке салыктар жана милдеттүү төлөмдөр түрүндө 1 млрд 176 млн доллар же 100 млрд сомдон ашык акча түшкөнүн айткан.

2025-жылы өлкө боюнча 26 тонна алтын өндүрүлгөн болсо, анын 12 тоннадан ашыгы “Кумтөргө” таандык. Ошол эле маалда компаниянын алтын сатуудан тапкан акчалай кирешеси 2025-жылы 44% өскөн.(KbA/ZKo)