Вучиќ се откажа од посетата на Црна Гора на Божиќ

Српскиот претседател Александар Вучиќ денеска изјави дека нема да го посети северот на Црна Гора на Божиќ, како што најави претходно.

На прес-конференцијата по средбата со патријархот на Српската православна црква Иринеј, Вучиќ рече дека црногорските власти би ја искористиле неговата посета да кажат дека се работи за напад врз независноста и уставниот поредок на нивната земја. Тој рече дека владиката Иринеј се согласил со неговата одлука.

Вучиќ додаде дека неговата посета веќе била подготвена, дека знае дека на литургијата во Плевља, на која имаше намера да присуствува, ќе дојдат 30 или 40 илјади Срби, но дека против него се води хајка.

Црна Гора донесе закон за верски заедници кој предизвика жестоки протести и ги затегна односите меѓу двете земји.

Според новиот закон, „сите верски објекти кои биле во сопственост на државата Црна Гора пред губењето на нејзината независност во 1918 година, а подоцна прешле во сопственост на некоја верска заедница на несоодветен правен начин, ќе се сметаат за државна сопственост и ќе бидат запишани како културно наследство“.

Српската православна црква, која е сопственик на најголем број од црквите во Црна Гора и има најмногу верници, смета дека се работи за обид црногорските власти „да ги ограбат“. Во Црна Гора постои и непризнаената Црногорска православна црква, но таа има малку верници.