Амнестијата за 27 април повторно на дневен ред во Уставен суд

Уставниот суд в среда повторно ќе ја разгледува иницијативата за проверка на уставноста на Законот за амнестија на учесниците во настаните од 27 април. На дневен ред на Уставниот суд е наведено дека ќе се разгледува Законот за амнестија во целина и посебно членот 2. Станува збор за иницијатива која е поднесена од Тодор Петров во која се оспорува постапката за амнестија во целост.

Пред повеќе од еден месец Уставниот суд кога ја разгледуваше иницијативата поднесена од поранешниот директор на УБК иеден од осудените за настаните на 27 април, Митко Чавков, судиите констатираа дека законот е во согласност со Уставот и дека Собранието има право да определи кој може да биде амнестиран.

Со амнестијата беа ослободени дел од обвинетите за 27 април, односно за упадот во Собранието во 2017 година.

Според судијата известител, Чавков ги оспорува првите два члена од Законот, затоа што смета дека се косат со Уставот. За Чавков, кој не беше амнестиран, спорна е еднаквоста на лицата пред законот, односно зашто дел добиле амнестија, а други не.

Меѓу амнестираните за „крвавиот четврток“ беа и петмината пратеници Крсто Мукоски, Сашо Василески, Јохан Тарчуловски, Љупчо Димовски и Љубен Арнаудов, кои беа обвинети дека ги отвориле вратите и ги насочувале лицата со фантомки и другите граѓани кон пленарната сала и кон прес-центарот во Собранието на 27 април. Меѓу амнестираните беа и водачите на протестите на „За заедничка Македонија“, Богдан Илиевски, Владо Јовановски и Борис Дамовски, кои беа обвинети дека со своите говори ги повикале граѓаните да влезат во законодавниот дом.