Со серијата насилства Авганистан во офанзива против милитантите

Авганистан започнува офанзива против талибанците и другите милитантни групи, најави авганистанскиот претседател Ашраф Гани, по денешните насилства во земјата кои резултираа со многу загинати и повредени луѓе.

Денеска вооружени лица нападнале болница во Кабул, бомбаш самоубиец се разнел на погреб, а имало и поставено бомба на пазар, при што загинаа десетици луѓе, меѓу нив и две новороденчиња. Засега ниедна група не презеде одговорност за нападите, а талибанците негираа дека тие стојат зад нападот на болница.

Гани во телевизиско обраќање ги обвини талибанците и Исламската држава (ИД) за нападите во државата. Тој рече дека на авганистанските безбедносни сили им е наредено да преминат во состојба на офанзива и да започнат операции против непријателите. Авганистанскиот претседател вели дека продолжувањето на операциите е неопходно за да се одбрани земјата, да се заштитат луѓето и инфраструктурата и да се одвратат нападите и заканите од талибанците и од сите други терористички групи.

Новороденчиња убиени во нападот на болница во Авганистан

Талибанците во февруари потпиша договор со САД во Катар со цел да се отвори патот за директни разговори помеѓу милитантната група и владата и да се стави крај на војната по повеќе од 18 години.

Но, талибанците ги засилија нападите во последните неколку недели и покрај ветувањето за намалување на насилството, додека милитантите на ИД, исто така, продолжија да ги таргетираат авганистанските безбедносни сили и цивилите.

Денеска во Кабул, тројца вооружени лица нападнаа државната болница при што загинале 14 лица, меѓу кои и две новороденчиња, а 15 други се повредени.

Во провинцијата Нангархар, загинале 24 лица, а повеќе од 68 повредени во напад од бомбаш-самоубиец за време на погреб.

И во југоисточната провинција Хост, експлодирала бомба поставена во автомобил на пазар, при што едно дете загинало, а повредени се 10 луѓе.